அரசியல் மேடைகளில் தனது உணர்ச்சிப்பூர்வமான பேச்சுகளால் ஆதரவாளர்களைக் கவர்ந்து வரும் நாம் தமிழர் கட்சியின் தலைமை ஒருங்கிணைப்பாளர் சீமான், தற்போது மீண்டும் திரையுலகை நோக்கித் தனது கவனத்தைச் செலுத்தி வருகிறார். அண்மையில் ‘லைக்கா’ தயாரிப்பில் ‘எல்.ஐ.கே’ திரைப்படத்தில் முக்கியக் கதாபாத்திரத்தில் நடித்திருந்த அவர், அதைத் தொடர்ந்து ‘சேயோன்’ திரைப்படத்திலும் ஒரு வலுவான வேடத்தில் நடிக்கவுள்ளதாகத் தகவல்கள் வெளியாகியுள்ளன. இதனிடையே, சுசீந்திரன் இயக்கத்தில் சாந்தனு நடிக்கும் ‘ஒரு கைதியின் டைரி’ என்ற புதிய திரைப்படத்தின் போஸ்டர் வெளியாகி, அதில் சீமானும் ஒரு முக்கியக் கதாபாத்திரத்தில் நடிக்கவிருப்பது அதிகாரப்பூர்வமாக அறிவிக்கப்பட்டுள்ளது.
அரசியல் களத்தில் தொடர்ச்சியாகச் சந்திக்கும் பின்னடைவுகள் மற்றும் தேர்தல் முடிவுகளால் ஏற்பட்ட அயர்ச்சியே, சீமானை மீண்டும் சினிமா செட்களை நோக்கித் தள்ளியுள்ளதாக அரசியல் விமர்சகர்கள் கருத்து தெரிவித்து வருகின்றனர். இருப்பினும், இத்தகைய விமர்சனங்களை மறுக்கும் சீமான் தரப்பு, தேர்தல் முடிவுகள் தனது அரசியல் பயணத்திற்கு என்றுமே முட்டுக்கட்டையாக இருக்காது எனத் தெளிவுபடுத்தியுள்ளது. எதுஎவ்வாறாயினும், மேடைகளில் முழங்கி வந்த சீமான் தற்போது அடுத்தடுத்து படங்களில் ஒப்பந்தமாகித் திரையில் தனது இரண்டாம் இன்னிங்ஸைத் தீவிரமாகத் தொடங்கியிருப்பது அவரது ரசிகர்களிடையேயும் தொண்டர்களிடையேயும் பெரும் கவனத்தைப் பெற்றுள்ளது.