கன்வார் யாத்திரையின் போது சிவபெருமானின் வாகனமான நந்தி வடிவில் மாற்றியமைக்கப்பட்ட இருசக்கர வாகனத்தில் இரு பக்தர்கள் வலம் வந்த நிகழ்வு பலருடைய கவனத்தையும் ஈர்த்துள்ளது. இந்த யாத்திரையில் பங்கேற்ற அவர்கள், தங்களின் பைக்கை முற்றிலும் வித்தியாசமான முறையில் நந்தி போல் காட்சியளிக்கும்படி வடிவமைத்து அனைவரையும் ஆச்சரியத்தில் ஆழ்த்தியுள்ளனர்.
இந்த ‘நந்தி பைக்’கின் வடிவமைப்பு பார்ப்பதற்கு அச்சு அசலாக ஒரு காளை மாட்டைப் போலவே இருந்தது. பைக்கின் முன்புறம் உள்ள முகப்பு விளக்கிற்கு மேல்புறத்தில் நந்தியின் முகம் பொருத்தப்பட்டிருந்ததுடன், வாகனம் முழுவதும் வெள்ளை நிற ரோமங்களால் நேர்த்தியாக அலங்கரிக்கப்பட்டிருந்தது. இணையத்தளமான ‘எக்ஸ்’ தளத்தில் “இந்தியா ஆரம்ப நிலையில் உள்ளவர்களுக்கானது அல்ல” என்ற வாசகத்துடன் பகிரப்பட்ட இந்த காணொளி, தற்போது சமூக வலைத்தளங்களில் வைரலாகப் பரவி பார்வையாளர்களின் பெரும் ஆர்வத்தைத் தூண்டியுள்ளது.
கன்வார் யாத்திரை என்பது ஆண்டுதோறும் சிவ பக்தர்களால் மேற்கொள்ளப்படும் ஒரு முக்கியமான ஆன்மீகப் பயணமாகும். ‘கன்வாரியாக்கள்’ என்று அழைக்கப்படும் இந்த பக்தர்கள், பல்வேறு புண்ணிய திருத்தலங்களுக்குச் சென்று கங்கை நதியிலிருந்து புனித நீரைச் சேகரித்து வருவார்கள். அவ்வாறு கொண்டுவரப்படும் புனித நீரைத் தங்களின் ஊர்களில் உள்ள சிவன் கோயில்களில் பயபக்தியுடன் சமர்ப்பித்து வழிபடுவதே இந்த யாத்திரையின் முக்கிய மரபாகும்.