பெங்களூரு ஊரகப் பகுதியில் உள்ள சிவகங்கை மலையில் தனியாகச் சென்ற 31 வயதான ஐஐடி பட்டதாரியும் மென்பொருள் பொறியாளருமான அத்வைத் உபாத்யாயா மாயமாகியுள்ளார். அவரது மோட்டார் சைக்ளீட் சிவகங்கை மலையின் அடிவாரத்தில் கண்டெடுக்கப்பட்டுள்ளது. மேலும், வழக்கமான மலையேற்றப் பாதையைத் தவிர்த்து, வேறு பகுதியிலிருந்து அவரது கைப்பேசியின் கடைசி சிக்னல் கிடைத்துள்ளதாகத் தெரியவந்துள்ளது.
கரடுமுரடான மற்றும் பாறை நிறைந்த இந்த மலைப் பகுதியில், ஆபத்தான ‘சாந்தலா டிராப்’ பகுதி உட்பட அனைத்து இடங்களிலும் தீவிர தேடுதல் வேட்டை நடைபெற்று வருகிறது. கர்நாடக மாநில பேரழிவு மீட்புப் படை, உள்ளூர் காவல்துறை மற்றும் அதிநவீன ட்ரோன் கேமராக்களின் உதவியுடன் மீட்புக் குழுவினர் தேடுதல் பணியில் ஈடுபட்டுள்ளனர்.
அத்வைத் உபாத்யாயாவைக் கண்டுபிடிக்கப் பல முகமைகள் இணைந்து இந்தத் தேடுதல் நடவடிக்கையைத் தொடர்ந்து மேற்கொண்டு வருகின்றன. சம்பவ இடத்தில் அவரது குடும்பத்தினரும் முகாமிட்டு மீட்புக் குழுவினருடன் இணைந்து நிலைமையை உன்னிப்பாகக் கண்காணித்து வருகின்றனர்.