தமிழகத்தில் ஆட்சி மாற்றம் ஏற்படும் போதெல்லாம் நிர்வாகச் செயல்பாடுகளைத் தங்களுக்குச் சாதகமாக மாற்றியமைக்க, ஐ.ஏ.எஸ். மற்றும் ஐ.பி.எஸ். அதிகாரிகளைப் பணியிட மாற்றம் செய்வது வழக்கமான ஒன்றுதான். அந்த வகையில், தற்போதைய தவெக அரசு, தங்களுக்கு நம்பிக்கையான அதிகாரிகளை முக்கியப் பொறுப்புகளில் அமர்த்தி வருகிறது. இந்த அதிரடி மாற்றங்களின் ஒரு பகுதியாக, தமிழக மக்களிடையே நன்கு அறியப்பட்ட மூத்த ஐ.ஏ.எஸ். அதிகாரியான ஜெ. ராதாகிருஷ்ணன் அவர்கள், தற்போது முக்கியத்துவமற்ற ஒரு பதவிக்கு மாற்றப்பட்டிருப்பது அரசு அதிகாரிகள் மற்றும் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
கடந்த 2004-ம் ஆண்டு நாகப்பட்டினத்தைத் தாக்கிய சுனாமி பேரழிவின் போது, மாவட்ட ஆட்சியராகத் தீவிரக் களப்பணியாற்றி மீட்புப் பணிகளை முன்னெடுத்த பெருமை ராதாகிருஷ்ணன் அவர்களுக்கு உண்டு. இவருடைய அர்ப்பணிப்பான சேவையைப் பாராட்டி, முன்னாள் அமெரிக்க அதிபர் பில் கிளிண்டனே நேரில் வந்து வெகுவாகப் பாராட்டினார். அதேபோல், கும்பகோணம் பள்ளித் தீ விபத்தின் போதும் பாதிக்கப்பட்ட குடும்பங்களுக்குத் தேவையான உதவிகளைச் செய்து மக்களின் நன்மதிப்பைப் பெற்றார். இதன் காரணமாகவே, முத்தமிழ் அறிஞர் கருணாநிதி, ஜெயலலிதா, எடப்பாடி பழனிசாமி மற்றும் மு.க.ஸ்டாலின் என அடுத்தடுத்து வந்த அனைத்து முதலமைச்சர்களின் ஆட்சிக் காலத்திலும் இவர் சுகாதாரம், மின்சாரம், போக்குவரத்து, உணவுப்பொருள் வழங்கல் போன்ற மிக முக்கியத் துறைகளின் தலைவராக வலம் வந்தார்.
முதலமைச்சர் விஜய் தலைமையிலான புதிய தவெக அரசு அமைந்த பிறகு, தமிழ்நாடு மின் உற்பத்தி மற்றும் பகிர்மான கழகத்தின் தலைவராக ராதாகிருஷ்ணன் செயல்பட்டு வந்தார். இன்னும் ஒரே மாதத்தில் அவர் பணி ஓய்வு பெறவுள்ள நிலையில், கடந்த இரண்டு மாதங்களாக வகித்து வந்த அந்தப் பொறுப்பிலிருந்து நேற்று திடீரென விடுவிக்கப்பட்டுள்ளார். அவருக்குப் பதிலாக, நிர்வாக வட்டாரத்தில் ‘டம்மி பதவி’ என்று கருதப்படும் அண்ணா நிர்வாகப் பணியாளர் கல்லூரியின் இயக்குநராக அவர் தூக்கியடிக்கப்பட்டுள்ளார். அண்மையில் தற்போதைய தலைமைச் செயலாளர் சாய்குமாருக்கு மேலும் 6 மாத காலப் பதவி நீட்டிப்பு வழங்கப்பட்டதைத் தொடர்ந்து, அவருக்கு இணக்கமான அதிகாரிகள் முக்கிய இடங்களுக்கு மாற்றப்பட்டு வருவதன் பின்னணியில் இந்த அதிரடியும் நடந்துள்ளதாகக் கூறப்படுகிறது.
ராதாகிருஷ்ணன் அவர்களின் இந்தத் திடீர் மாற்றத்திற்குப் பின்னணியில் சில வலுவான காரணங்களும் கிசுகிசுக்கப்படுகின்றன. தவெக அரசு குறிவைத்துள்ள முன்னாள் மின்சாரத்துறை அமைச்சர் செந்தில் பாலாஜி மீதான விசாரணைகள் துரிதப்படுத்தப்பட்டுள்ள நிலையில், ராதாகிருஷ்ணன் தொடர்ந்து மின்வாரியப் பொறுப்பில் நீடித்தால் விசாரணை சரிவரப் போகாது என்று அரசு கருதியதே முதன்மைக் காரணம் என்று சொல்லப்படுகிறது. இதுமட்டுமன்றி, சமீபகாலமாகத் தமிழகத்தின் பல்வேறு மாவட்டங்களில் ஏற்பட்டு வரும் தொடர் மின்வெட்டுகளைத் தடுக்க அவர் உரிய நடவடிக்கை எடுக்கவில்லை என்ற அதிருப்தியும் எழுந்துள்ளது. இதன் விளைவாகவே, அனைத்து ஆட்சிகளிலும் ‘கெத்தாக’ வலம் வந்த ஒரு நேர்மையான அதிகாரி, ஓய்வுபெறும் விளிம்பில் ஓரங்கட்டப்பட்டுள்ளார்.