மத்தியப் பிரதேச மாநிலம் இந்தூரில் பெய்த கனமழையால் திருமண மண்டபம் ஒன்று முற்றிலும் வெள்ளத்தில் மூழ்கிய போதிலும், மணமக்களின் உற்சாகத்தோடு திருமண சடங்குகள் தடையின்றி நடந்து முடிந்துள்ளன. இந்தூரின் கேட் ரோடு பகுதியில் உள்ள ஒரு திருமண மண்டபத்தில் பூர்வா மற்றும் வைபவ் ஆகியோரின் திருமணம் நடைபெறவிருந்தது. ஆனால், கடந்த சில நாட்களாக பெய்த பலத்த மழையால் மண்டபத்திற்குள் சுமார் 1.5 முதல் 2 அடி வரை தண்ணீர் தேங்கி, அது ஒரு குளம் போல காட்சியளித்தது. இந்த இக்கட்டான சூழ்நிலையிலும் மனம் தளராத மணமக்கள், தண்ணீருக்குள்ளேயே தங்களது திருமண சடங்குகளை மகிழ்ச்சியோடு நிறைவேற்றி, இந்த நாளை தங்களுக்குள் ஒரு மறக்க முடியாத பருவமழைக்கால திருமணமாக மாற்றிக் கொண்டனர்.
சமூக ஊடகங்களில் தற்போது காட்டுத்தீயாய் பரவி வரும் ஒரு வைரல் வீடியோவில், திருமண ஆடைகளுடன் இருக்கும் மணமகன், தனது மணமகளை கைகளில் தூக்கிக்கொண்டு வெள்ள நீரில் நடந்து செல்லும் நெகிழ்ச்சியான காட்சி இடம்பெற்றுள்ளது. உணவருந்தும் பகுதி மற்றும் மணமேடைக்குச் செல்லும் வழியில் தண்ணீர் தேங்கி நின்றதால், மணமகன் தனது மணமகளைக் தூக்கிச் சென்றதோடு, நடுவழியில் அவரை கீழே போடுவது போல விளையாட்டாக பாவனை செய்து சிரிக்க வைத்தார். சுற்றிலும் தண்ணீர் சூழ்ந்திருக்க, காலணிகள் மிதக்கும் அந்த மண்டபத்தில், உறவினர்களும் விருந்தினர்களும் தண்ணீரில் நின்றுகொண்டே மணமக்களை வாழ்த்தினர். “யார் என்ன நினைத்தால் என்ன?” என்ற பாணியில், தடைகளையும் தாண்டி தங்களின் வாழ்நாள் தருணத்தை நெகிழ்ச்சியோடும் புன்னகையோடும் எதிர்கொண்ட இந்த புதுமணத்தம்பதியின் வீடியோ நெட்டிசன்களை வெகுவாகக் கவர்ந்து வருகிறது.