உலகளாவிய தொழில்நுட்ப சந்தையில் ஏற்பட்டுள்ள மந்தநிலை மற்றும் ஏஐ (AI) தொழில்நுட்பத்திற்கான அதீத முதலீடுகள் காரணமாக, முன்னணி நிறுவனங்கள் தொடர்ந்து ஆட்குறைப்பு நடவடிக்கைகளில் ஈடுபட்டு வருகின்றன. ஏற்கனவே மெட்டா நிறுவனம் 8,000 ஊழியர்களையும், அமேசான் நிறுவனம் கணிசமான பணியாளர்களையும் பணிநீக்கம் செய்திருந்த நிலையில், தற்போது மைக்ரோசாஃப்ட் நிறுவனமும் இந்த வரிசையில் இணைந்துள்ளது. இந்த ஆண்டின் தொடக்கத்தில் சுமார் 9,000 ஊழியர்களுக்கு விருப்ப ஓய்வு திட்டத்தை வழங்கிய மைக்ரோசாஃப்ட் நிறுவனம், நடப்பு ஆண்டின் முதல் ஆறு மாதங்களில் 2022-ஆம் ஆண்டுக்குப் பிறகான மிக மோசமான பங்குச் சந்தை சரிவைச் சந்தித்துள்ளது. தற்போதைய நவீன யுகத்தில் ஏஐ தொழில்நுட்பத்தில் முன்னிலை வகிக்க மைக்ரோசாஃப்ட் பெரும் தொகையை முதலீடு செய்து வருவதால், நிறுவனத்தின் செயல்பாட்டுச் செலவுகள் பன்மடங்கு அதிகரித்துள்ளன.
இந்தக் கூடுதல் செலவினங்களைக் கட்டுப்படுத்தி, நிதிநிலையைச் சீரமைக்கும் நோக்கில் மைக்ரோசாஃப்ட் நிறுவனம் தற்போது ஒரு அதிரடியான முடிவை எடுத்துள்ளது. அதன்படி, உலகம் முழுவதும் தன் நிறுவனத்தில் பணிபுரியும் மொத்த பணியாளர்களில் 2.1 சதவீத ஊழியர்களை, அதாவது சுமார் 4,800 பேரை பணிநீக்கம் செய்யத் திட்டமிட்டுள்ளது. ஏற்கனவே வேலை இழப்பு அச்சத்தில் இருந்த ஊழியர்களுக்கு, மைக்ரோசாஃப்ட் நிறுவனத்தின் இந்த அடுத்தடுத்த ஆட்குறைப்பு அறிவிப்புகள் பெரும் அதிர்ச்சியையும் கவலையையும் ஏற்படுத்தியுள்ளன. ஏஐ தொழில்நுட்பத்தின் அசுர வளர்ச்சி ஒருபுறம் வியப்பை ஏற்படுத்தினாலும், மறுபுறம் அது கார்ப்பரேட் துறையில் உள்ள ஊழியர்களின் வேலைவாய்ப்பிற்குப் பெரும் சவாலாக மாறி வருவதையே இந்தச் சூழல் உணர்த்துகிறது.