அ.தி.மு.க.,வில் இருந்து விலகி மாற்று முகாமிற்குச் சென்ற முன்னாள் அமைச்சர்கள் மற்றும் கட்சிக்குள் இருந்துகொண்டே தனக்கு எதிராகக் குடைச்சல் கொடுக்கும் ‘மாஜி’களுக்கு எதிராக, அக்கட்சியின் பொதுச்செயலாளர் எடப்பாடி பழனிசாமி புதிய அஸ்திரத்தை கையில் எடுத்துள்ளதாகத் தகவல் வெளியாகியுள்ளது. சமீபத்திய அரசியல் மாற்றங்களால் தமிழக வெற்றிக் கழகத்தில் இணைந்த முன்னாள் அமைச்சர்கள் சி.விஜயபாஸ்கர், எம்.ஆர்.விஜயபாஸ்கர் உள்ளிட்டோரின் செயலால் அ.தி.மு.க தலைமை கடும் அதிருப்தியில் உள்ளது. இவர்களை அரசியல் ரீதியாக ஒடுக்க, அவர்கள் அமைச்சர்களாக இருந்தபோது நடைபெற்ற துறைகளின் முறைகேடுகள் மற்றும் பினாமி சொத்துக்கள் அடங்கிய ரகசிய ஊழல் ஆவணங்களை டில்லி பா.ஜ., தலைமைக்கு நகர்த்த எடப்பாடி பழனிசாமி திட்டமிட்டுள்ளதாகக் கூறப்படுகிறது.
ஜெயலலிதா மற்றும் சசிகலா ஆட்சிக் காலத்தில் சேகரிக்கப்பட்ட முக்கிய கோப்புகளுடன், பழனிசாமி முதல்வராக இருந்தபோது திரட்டப்பட்ட முன்னாள் அமைச்சர்களின் அந்தரங்க விபரங்கள் மற்றும் பல ஆயிரம் கோடி ரூபாய் சொத்து ஆதாரங்கள் தற்போது எடப்பாடியின் வசம் உள்ளன. தற்போதைய சூழலில் டில்லி பா.ஜ., தலைமை த.வெ.க மீது மென்மையான போக்கை கடைப்பிடித்தாலும், எதிர்காலத்தில் எழும் அரசியல் போட்டிகளின் போது த.வெ.க-வை கட்டுப்படுத்த இந்த ஆவணங்களை டில்லி பயன்படுத்தும் என பழனிசாமி கணக்கு போடுகிறார். டில்லி பா.ஜ., தலைவர்கள் மூலமாகவும், சமூக ஆர்வலர்கள் வழியாக நீதிமன்றங்களில் ஊழல் வழக்குகளைத் தொடரச் செய்வதன் மூலமும் தனக்கு எதிராகச் செயல்படும் ‘மாஜி’க்களை முடக்க அவர் வியூகம் அமைத்து வருகிறார்.
இருப்பினும், எடப்பாடி பழனிசாமியின் இந்த அதிரடித் திட்டத்திற்கு அவரது நெருக்கமான ஆதரவாளர்கள் சிலரே முட்டுக்கட்டை போட்டு வருவதாகவும் அரசியல் வட்டாரங்களில் பேசப்படுகிறது. “தற்போது விலகிச் சென்றவர்கள் மீது நடவடிக்கை எடுத்தாலும், அவர்கள் அ.தி.மு.க ஆட்சியில் அமைச்சர்களாக இருந்தவர்கள் என்பதால், இந்த ஊழல் புகார்கள் ஒட்டுமொத்தமாக அ.தி.மு.க-விற்குத் தான் மக்கள் மத்தியில் பெரும் கெட்டப் பெயரைத் தேடித்தரும்” என்று அவர்கள் எச்சரித்துள்ளனர். இதனால், சொந்தக் கட்சியினரையே குறிவைத்து எடப்பாடி பழனிசாமி ஏவத் துணியும் இந்த ஊழல் அஸ்திரம், அ.தி.மு.க-விற்கு சாதகமாக அமையுமா அல்லது சுயபாதிப்பை ஏற்படுத்துமா என்ற விவாதம் தற்போதைய அரசியல் அரங்கில் சூடுபிடித்துள்ளது.