ஈராக் நாட்டின் முன்னாள் நாடாளுமன்ற உறுப்பினரான ஹிந்த் அல்-அப்பாஸி என்பவரது வீட்டில் நடத்தப்பட்ட அதிரடி ஊழல் தடுப்பு சோதனையில், தங்க முலாம் பூசப்பட்ட உள்ளாடைகள் பறிமுதல் செய்யப்பட்டுள்ள விசித்திரமான சம்பவம் சர்வதேச அளவில் பெரும் அதிர்ச்சியை ஏற்படுத்தியுள்ளது. ஈராக் பிரதமரின் உத்தரவின் பேரில், அந்நாட்டின் கூட்டாட்சி நேர்மை ஆணையம் மற்றும் பாதுகாப்புப் படையினர் இணைந்து நடத்திய இந்த மெகா ஊழல் எதிர்ப்பு வேட்டையில், ஹிந்த் அல்-அப்பாஸி உட்பட மொத்தம் 47 முக்கிய அரசியல்வாதிகள் மற்றும் அரசு அதிகாரிகள் கைது செய்யப்பட்டுள்ளனர். இவர்களிடமிருந்து ஒட்டுமொத்தமாக சுமார் 2,700 கோடி ரூபாய் மதிப்பிலான சொத்துக்கள் மற்றும் ஆவணங்கள் பறிமுதல் செய்யப்பட்டுள்ளன.
இந்த சோதனையில் குறிப்பாக பெண் எம்பியான ஹிந்த் அல்-அப்பாஸியின் வீட்டில் நுழைந்த அதிகாரிகள் அங்குள்ள சொகுசுப் பொருட்களைக் கண்டு திகைத்துப் போயுள்ளனர். அவரது வீட்டில் இருந்து மட்டும் இந்திய மதிப்பில் சுமார் 539 கோடி ரூபாய் ரொக்கப் பணமும், 27 கிலோ தூய்மையான தங்கமும் கைப்பற்றப்பட்டதாகக் கூறப்படுகிறது. இதில் உச்சகட்டமாக, அவர் தங்கத்திலான உள்ளாடைகளைப் பயன்படுத்தி வந்ததும் அதிகாரிகளால் கண்டுபிடிக்கப்பட்டு பறிமுதல் செய்யப்பட்டுள்ளது. இவரைப் போலவே ‘அலியா நசிப்’ என்ற மற்றொரு பெண் எம்பியின் வீட்டிலும் சோதனை நடத்தப்பட்டு, அங்கிருந்து சுமார் 146 கோடி ரூபாய் வரையிலான சொத்துக்கள் பறிமுதல் செய்யப்பட்டுள்ளன.
மக்களின் வரிப்பணத்தைச் சூறையாடி, இது போன்ற விசித்திரமான சொகுசு வாழ்க்கையை வாழ்ந்து வந்த அரசியல்வாதிகளின் இந்த லீலைகள் தற்போது சமூக ஊடகங்களில் காட்டுத்தீயாய் பரவி வருகின்றன. கைது நடவடிக்கை அதிகாரப்பூர்வமாக உறுதி செய்யப்பட்டிருந்தாலும், பறிமுதல் செய்யப்பட்ட தங்கத்தின் துல்லியமான அளவு மற்றும் இந்த முறைகேட்டுப் பணம் எந்தெந்த கணக்குகளில் இருந்து கையாடல் செய்யப்பட்டது என்பது குறித்து ஈராக் அதிகாரிகள் தொடர்ந்து தீவிர விசாரணை நடத்தி வருகின்றனர். உலக அரங்கில் பெரும் பேசுபொருளாக மாறியுள்ள இந்த சம்பவம், ஈராக்கில் நடந்துள்ள மிகப்பாரிய ஊழல் நெட்வொர்க்கை வெளிச்சத்திற்கு கொண்டு வந்துள்ளது.