ராஜஸ்தான் மாநிலம் ஸ்ரீ கங்கானகர் மாவட்டத்தில் 13 வயது சிறுமி ஒருவர் ஐந்து நாட்களில் 30-க்கும் மேற்பட்ட நபர்களால் கூட்டுப் பாலியல் வன்கொடுமைக்கு உள்ளாக்கப்பட்ட கொடூர சம்பவம் நாடு முழுவதும் பெரும் அதிர்வலைகளை ஏற்படுத்தியுள்ளது. வீட்டிலிருந்து காணாமல் போன அச்சிறுமியை ஆட்டோ மற்றும் ரிக்ஷா ஓட்டுநர் ஒருவர் கடத்திச் சென்று, சட்டவிரோத ஹோட்டல் உரிமையாளர்களிடம் கைமாற்றியுள்ளார். மனிதாபிமானமற்ற முறையில் ஐந்து நாட்களாகப் பல ஹோட்டல்களுக்குக் கடத்திச் செல்லப்பட்ட அந்தச் சிறுமி, தொடர் சீரழிவுக்கு ஆளாக்கப்பட்டுள்ளார்.
இந்தக் கொடூரத்தின் உச்சமாக, தொடர்ச்சியான வன்கொடுமையால் சிறுமிக்கு உடலில் கடுமையான வலி ஏற்பட்டபோதெல்லாம், அந்த வலியைத் தாங்கிக் கொள்ளுமாறு கூறி அவரை வற்புறுத்தி மது அருந்தச் செய்த அதிர்ச்சித் தகவலும் முதல் தகவல் அறிக்கையின் மூலம் வெளிவந்துள்ளது. இக்குற்றத்தில் வெறும் தனிநபர்கள் மட்டுமன்றி, பல ஹோட்டல் உரிமையாளர்கள் மற்றும் மேலாளர்களுக்கும் நேரடித் தொடர்பு இருப்பதும், இச்சம்பவத்தை மூடிமறைக்க அவர்கள் முயன்றதும் காவல்துறை விசாரணையில் அம்பலமாகியுள்ளது.
இச்சம்பவம் தொடர்பாகப் பல்வேறு ஹோட்டல் உரிமையாளர்கள், மேலாளர்கள் மற்றும் தொடர்புடைய நபர்களைக் காவல்துறையினர் தற்போது கைது செய்துள்ளனர். ஸ்ரீ கங்கானகர் பகுதியில் சுற்றுலாத் தலம் ஏதும் இல்லாத நிலையிலும், அங்கு நூற்றுக்கும் மேற்பட்ட சட்டவிரோத ஹோட்டல்கள் தங்கு தடையின்றி இயங்கி வருவது தற்போதைய விசாரணையில் வெளிச்சத்திற்கு வந்துள்ளது. இத்தகைய சட்டவிரோத விடுதிகளை உடனடியாகக் கண்டறிந்து சீல் வைக்க வேண்டும் என்ற கோரிக்கையும் பொதுமக்கள் மத்தியில் வலுத்துள்ளது.
இந்தக் கொடூரத்தைக் கண்டித்து எதிர்க்கட்சியினர் மற்றும் சமூக ஆர்வலர்கள் தீவிரப் போராட்டத்தில் ஈடுபட்டுள்ளனர். பாதிக்கப்பட்ட சிறுமிக்கு விரைந்து நீதி கிடைக்க வேண்டும், சம்பந்தப்பட்ட காவல் அதிகாரிகளைப் பணியிடை நீக்கம் செய்ய வேண்டும் மற்றும் குற்றவாளிகள் அனைவருக்கும் மரண தண்டனை விதிக்கப்பட வேண்டும் என்று அரசியல் தலைவர்கள் வலியுறுத்தியுள்ளனர். இந்த வழக்கில் விரைவான மற்றும் வெளிப்படையான சட்ட நடவடிக்கை எடுக்கப்படாவிட்டால், மாநிலம் தழுவிய அளவில் மாபெரும் போராட்டங்கள் வெடிக்கும் எனவும் எச்சரிக்கை விடுக்கப்பட்டுள்ளது.