கர்நாடகா மாநிலம் மங்களூர் அருகே அரபிக்கடலில் மீன்பிடித்துக் கொண்டிருந்த மீனவர்கள், திடீரென ஏற்பட்ட மோசமான வானிலை மற்றும் கடல் கொந்தளிப்பில் சிக்கினர். இதில் அவர்கள் பயணம் செய்த ‘மஞ்சு மாதா’ என்ற மீன்பிடி படகு பலத்த சேதமடைந்து கடலில் மூழ்கும் நிலைக்குத் தள்ளப்பட்டது. இதனால் படகில் இருந்த 6 மீனவர்களும் நடுக்கடலில் தத்தளித்தபடி, உயிருக்குப் போராடிக் கொண்டிருந்தனர்.
இதுகுறித்த தகவல் அறிந்தவுடன், இந்திய கடலோர காவல்படைக்குச் சொந்தமான ‘சாச்செட்’ (ICGS Sachet) என்ற அதிநவீன கப்பல் உடனடியாக தேடுதல் மற்றும் மீட்புப் பணியில் களமிறங்கியது. ராட்சத அலைகளுக்கு மத்தியிலும் கடலோர காவல்படை வீரர்கள் சாமர்த்தியமாகச் செயல்பட்டு, நடுக்கடலில் தத்தளித்துக் கொண்டிருந்த 6 மீனவர்களையும் பத்திரமாக மீட்டனர். மீட்கப்பட்ட மீனவர்கள் அனைவரும் உடனடியாக புதிய மங்களூரு துறைமுகத்திற்கு அழைத்து வரப்பட்டு, அவர்களுக்குத் தேவையான அவசர மருத்துவ உதவிகள் மற்றும் உணவுப் பொருட்கள் வழங்கப்பட்டன.
இந்தச் நெகிழ்ச்சியான மீட்பு நடவடிக்கை குறித்த வீடியோ மற்றும் புகைப்படங்களை இந்திய கடலோர காவல்படை தனது அதிகாரப்பூர்வ சமூக வலைத்தளப் பக்கத்தில் வெளியிட்டுள்ளது. அத்துடன், ஜூன் 29 அன்று நடைபெற்ற இந்த ஆபத்தான மீட்புப் பணியைக் குறிப்பிட்டு, “ஒவ்வொரு உயிரும் முக்கியம்” என்ற வாசகத்தோடு மீனவர்களின் பாதுகாப்பை உறுதி செய்வதில் தங்களின் அர்ப்பணிப்பை காவல்படை மீண்டும் பறைசாற்றியுள்ளது.