மாற்றுக்கட்சிகளில் இருந்து முன்னாள் சட்டமன்ற உறுப்பினர்களும், முக்கிய நிர்வாகிகளும் தமிழக வெற்றிக் கழகத்தில் இணைவதைக் கண்டு, கட்சியின் அடிமட்டத் தொண்டர்கள் யாரும் கவலைப்பட வேண்டாம் என்று அக்கட்சியின் முக்கிய நிர்வாகியான என். ஆனந்த் தெரிவித்துள்ளார். புதியவர்களின் வருகையால் தங்களுக்குக் கட்சியில் உரிய மரியாதையும் அங்கீகாரமும் கிடைக்காது எனக் கூறி, சில பகுதிகளில் உள்கட்சிப் பூசல் மற்றும் அதிருப்தி வெடித்தது. இதற்கு முற்றுப்புள்ளி வைக்கும் வகையில், நீண்ட காலமாக கட்சிக்காக உழைத்தவர்களின் பங்களிப்பு ஒருபோதும் வீண் போகாது என்று அவர் தொண்டர்களுக்குத் தைரியம் அளித்துள்ளார்.
மேலும், வரவிருக்கும் உள்ளாட்சித் தேர்தல் முதல் அனைத்து நிலைகளிலும் கட்சியின் உண்மைத் தொண்டர்களுக்கு உரிய அங்கீகாரமும், தகுதியான முன்னுரிமையும் நிச்சயம் வழங்கப்படும் என்று அவர் உறுதியளித்துள்ளார். மாற்றுக்கட்சியினரின் சேர்க்கை என்பது தவெகவை வலுப்படுத்துவதற்கான ஒரு தற்காலிக நடவடிக்கை மட்டுமே என்றும், ஆரம்பம் முதலே களத்தில் நின்று உழைத்த நிர்வாகிகளின் உரிமைகளும் மரியாதையும் எப்போதும் நிலைநாட்டப்படும் என்றும் அவர் தெளிவுபடுத்தியுள்ளார்.