அதிமுக முன்னாள் போக்குவரத்துத் துறை அமைச்சரும், கரூர் சட்டமன்ற உறுப்பினருமான எம்.ஆர். விஜயபாஸ்கர் தமிழக வெற்றிக் கழகத்தில் இணையப்போவதாகப் பரவிய வதந்திகளுக்குத் திட்டவட்டமாக முற்றுப்புள்ளி வைத்துள்ளார். கரூர் மாவட்ட ஆட்சியர் அலுவலகத்தில் நடைபெற்ற கூட்டத்தில் பங்கேற்ற பின் செய்தியாளர்களைச் சந்தித்த அவர், தான் தவெகவில் இணைய உள்ளதாக வெளியான செய்திகளில் எவ்வித உண்மையும் இல்லை என்றும், அது முற்றிலும் தவறான தகவல் என்றும் கூறினார்.
மேலும், பதவியை ராஜினாமா செய்துவிட்டு தவெகவில் இணைகிறீர்களா என்ற செய்தியாளர்களின் கேள்விக்கு, “அப்படியெல்லாம் எதுவும் கிடையாது” என மறுத்ததோடு, மற்றொரு முன்னாள் அமைச்சரான சி. விஜயபாஸ்கருடன் இணைந்து தவெகவுக்குச் செல்கிறீர்களா என்ற கேள்விக்கு ‘கிடையாது’ என ஒற்றை வார்த்தையில் பதிலளித்து வதந்திகளுக்கு முற்றுப்புள்ளி வைத்தார். இதன் மூலம், அதிமுகவை விட்டு விலகும் எண்ணம் தனக்கு இல்லை என்பதை அவர் தெளிவுபடுத்தியுள்ளார்.