2026 தமிழ்நாடு சட்டமன்றத் தேர்தலில், கடந்த மு.க. ஸ்டாலின் தலைமையிலான திமுக அரசு சந்தித்த எதிர்பாராத தோல்விக்கு ‘கலைஞர் மகளிர் உரிமைத்தொகை’ திட்டமே முக்கியக் காரணம் என திமுகவின் கள ஆய்வு அறிக்கை மூலம் தெரியவந்துள்ளது. திமுகவின் துருப்புச்சீட்டாகக் கருதப்பட்ட இத்திட்டம், தேர்தலில் அக்கட்சிக்கு எதிராகத் திரும்பியது பெரும் அதிர்ச்சியை ஏற்படுத்தியுள்ளது. தவெக போன்ற புதிய சக்திகளின் எழுச்சிக்கு மத்தியில், 176 தொகுதிகளில் போட்டியிட்டு வெறும் 59 இடங்களை மட்டுமே திமுகவால் கைப்பற்ற முடிந்தது. இத்தோல்வி குறித்து ஆராய அமைக்கப்பட்ட 19 குழுக்களின் கள ஆய்வில், மகளிர் உரிமைத்தொகை திட்டத்தில் இருந்த குளறுபடிகளே பின்னடைவுக்கு முதன்மை காரணியாக சுட்டிக்காட்டப்பட்டுள்ளது.
முதற்கட்டமாக 1.13 கோடிப் பெண்களுக்கும், பின்னர் 1.30 கோடிப் பெண்களுக்கும் இத்திட்டத்தின் கீழ் மாதம் 1,000 ரூபாய் வழங்கப்பட்ட போதிலும், தகுதியிருந்தும் விடுபட்ட லட்சக்கணக்கான பெண்களின் அதிருப்தியே திமுகவின் வீழ்ச்சிக்கு வழிவகுத்துள்ளது. தங்களுக்கு உரிமைத்தொகை கிடைக்காததால் ஏமாற்றமடைந்த பெண்கள், அரசு மீது கடும் அவநம்பிக்கை கொண்டு தவெக மற்றும் எதிர்க்கட்சிகளுக்கு ஆதரவாக மாறினர். மேலும், இத்திட்டத்தின் மூலம் ஏற்கனவே பயனடைந்து வந்த 40 சதவீதப் பெண்களும்கூட இந்த தேர்தலில் திமுகவுக்கு வாக்களிக்கவில்லை என்ற அதிர்ச்சிகரமான உண்மை இந்த ஆய்வு அறிக்கையின் மூலம் வெளிச்சத்திற்கு வந்துள்ளது.
இதற்கிடையே, தவெக தலைவர் விஜய்க்கு பெண்கள் மத்தியில் இருந்த அசுரத்தனமான செல்வாக்கு மற்றும் கள நிலவரம் குறித்து திமுகவின் அடிமட்டத் தொண்டர்களும், கீழ்மட்டப் பொறுப்பாளர்களும் மாவட்டத் தலைமையிடம் பலமுறை எடுத்துக்கூறியுள்ளனர். இருப்பினும், மாவட்டப் பொறுப்பாளர்கள் அதனைப் பெரிதாகக் கண்டுகொள்ளாமல் அலட்சியப்படுத்தியதே இந்த வரலாற்றுப் பூர்வ தோல்விக்குக் காரணம் என அறிக்கை கூறுகிறது. பெண்களின் அதிருப்தியைக் கணிக்கத் தவறியதும், அடிமட்டத் தொண்டர்களின் குரலுக்குத் தலைமைத்துவம் செவிசாய்க்காததுமே 59 ஆண்டுகால திராவிடக் கட்சிகளின் ஆதிக்கத்தை உடைத்து புதிய அரசியல் மாற்றம் உருவாகக் காரணமாக அமைந்துள்ளது.