உலக அரங்கில் அமெரிக்காவிற்கு இணையாக மிக வேகமாக வளர்ந்து வந்த சீனா, தற்போது தன் வரலாற்றிலேயே சந்திக்காத ஒரு மிகப்பெரிய உள்நாட்டுச் சவாலை எதிர்கொண்டுள்ளது. கடந்த நூற்றாண்டில் மக்கள் தொகை உயர்வு உலக நாடுகளுக்குப் பெரும் கவலையாக இருந்த நிலையில், இந்த நூற்றாண்டில் மக்கள் தொகைச் சரிவு சீனாவின் ஆதிக்கத்தையே உலுக்கத் தொடங்கியுள்ளது. சுமார் 140 கோடி என்ற உச்சத்தைத் தொட்ட சீனாவின் மக்கள் தொகை, இப்போது பிறப்பு விகிதத்தை விட இறப்பு விகிதம் அதிகரித்ததால் வேகமாகச் சரிந்து வருகிறது. 2010களின் மத்தியில் ஆண்டுக்கு 1.8 கோடியாக இருந்த குழந்தை பிறப்பு, தற்போது ஒரு கோடிக்கும் கீழே குறைந்துள்ளது. இதே நிலை நீடித்தால், 2100ஆம் ஆண்டிற்குள் சீனாவின் மக்கள் தொகை பாதியாகவோ அல்லது அதற்கும் குறைவாகவோ சுருங்கக்கூடும் என ஐநா உள்ளிட்ட சர்வதேச அமைப்புகள் எச்சரிக்கின்றன.
இந்த அபாயகரமான நிலைக்குச் சீனா 1980 முதல் 2016 வரை தீவிரமாக நடைமுறைப்படுத்திய “ஒரே குழந்தை திட்டமே” (One-Child Policy) முதன்மைக் காரணமாகும். இத்திட்டத்தால் ஆண் குழந்தைகளுக்கு முன்னுரிமை அளிக்கப்பட்டதால், பாலின விகிதம் முற்றிலும் பாதிக்கப்பட்டு, இன்று குழந்தை பெற்றுக்கொள்ளும் வயதில் இருக்கும் பெண்களின் எண்ணிக்கை சீனாவில் பெருமளவில் குறைந்துவிட்டது. தற்போதைய சூழலில் பெண்களின் எண்ணிக்கையே குறைவாக இருக்கும்போது, அரசு எவ்வளவு சலுகைகள் மற்றும் மானியங்கள் வழங்கினாலும் மக்கள் தொகையை மீண்டும் உயர்த்துவது சாத்தியமற்ற ஒன்றாக மாறியுள்ளது என்று பொருளாதார வல்லுநர்கள் சுட்டிக்காட்டுகின்றனர்.
சீனாவின் அசுர பொருளாதார வளர்ச்சிக்கு இத்தனை காலம் முதுகெலும்பாக இருந்தது அங்குள்ள உழைக்கும் வர்க்கமே ஆகும். ஆனால், தற்போது 15 முதல் 64 வயதுக்குட்பட்ட தொழிலாளர்களின் எண்ணிக்கை குறைந்து, 65 வயதிற்கு மேற்பட்ட முதியவர்களின் எண்ணிக்கை மிக வேகமாக அதிகரித்து வருகிறது. இதனால், அரசுக்கு வரி செலுத்தும் இளைஞர்களின் எண்ணிக்கை குறைந்து, ஓய்வூதியம் மற்றும் மருத்துவச் செலவுகள் தேவைப்படும் முதியவர்கள் அதிகரிப்பதால் சீனாவின் நிதி நிலைமை பெரும் நெருக்கடிக்கு உள்ளாகும். மேலும், நாட்டின் நுகர்வுச் சந்தையும் (Consumption Market) இதனால் பலவீனமடைந்து ஒட்டுமொத்த உற்பத்தித் திறனும் முடங்கும் அபாயம் ஏற்பட்டுள்ளது.
இச்சரிவைத் தடுக்க சீன அரசு தற்போது மூன்று குழந்தைகள் வரை பெற்றுக்கொள்ள அனுமதி அளித்து, ரொக்கப் பணம், வீட்டு வசதி மானியம் மற்றும் மகப்பேறு விடுமுறை நீட்டிப்பு போன்ற சலுகைகளை வாரி வழங்கினாலும், சீன இளைஞர்கள் குழந்தை பெற்றுக்கொள்ளத் தயங்குகிறார்கள். அதிகப்படியான வாடகை, கடுமையான வேலை நேரம் மற்றும் குழந்தைகளின் கல்விக்கான கடுமையான போட்டி போன்ற வாழ்வாதாரச் செலவுகளே இதற்குக் காரணமாகும். சீனாவின் இந்தத் தொழிலாளர் பற்றாக்குறையைப் பயன்படுத்தி, ஆப்பிள் போன்ற உலகளாவிய முன்னணி நிறுவனங்கள் தங்கள் தொழிற்சாலைகளை இந்தியா, வியட்நாம் போன்ற நாடுகளுக்கு மாற்றத் தொடங்கியுள்ளன. உள்நாட்டுப் பிரச்சினைகளுக்கே அதிக நிதி ஒதுக்க வேண்டிய கட்டாயத்திற்குத் தள்ளப்படுவதால், அமெரிக்காவுடனான உலகளாவிய போட்டியில் சீனா பின்தங்குவதுடன், இந்தியாவின் பொருளாதார வளர்ச்சிக்கு இது பெரும் சாதகமாக அமையும் என்றும் எதிர்பார்க்கப்படுகிறது.