அமெரிக்க அதிபர் டொனால்ட் டிரம்ப் மற்றும் இஸ்ரேல் பிரதமர் பெஞ்சமின் நெதன்யாகு இடையே லெபனான் விவகாரம் தொடர்பாக காரசாரமான தொலைபேசி உரையாடல் ஒன்று நடந்துள்ளது. இந்த உரையாடலின் போது நெதன்யாகுவை தான் “முற்றிலும் பைத்தியக்காரன்” என்று திட்டியதை டொனால்ட் டிரம்ப் ஒப்புக்கொண்டுள்ளார். நியூயார்க் போஸ்ட் பாட்காஸ்டில் பேசிய டிரம்ப், தான் கோபப்படவில்லை என்றும், ஆனால் லெபனானுடன் இஸ்ரேல் தொடர்ந்து சண்டையிட்டு வருவதைக் கண்டு தான் சற்று வருத்தமடைந்ததாகத் (perturbed) தெரிவித்துள்ளார்.
இந்த தொலைபேசி உரையாடலின் போது, நெதன்யாகுவின் ஊழல் வழக்கு விசாரணையின் போது அவருக்கு ஆதரவாக இருந்ததைக் குறிப்பிட்ட டிரம்ப், நெதன்யாகுவிற்கு நன்றியுணர்வு இல்லை என்று குற்றம் சாட்டியுள்ளார். “நான் மட்டும் இல்லையென்றால் நீ இப்போது சிறையில் இருந்திருப்பாய், உன்னை நான் தான் காப்பாற்றுகிறேன். உன்னுடைய இந்த செயலால் இப்போது எல்லாரும் உன்னையும், இஸ்ரேலையும் வெறுக்கிறார்கள்” என்று டிரம்ப் கடுமையாக பேசியதாக ஊடகங்கள் செய்தி வெளியிட்டுள்ளன.
இருப்பினும், இந்த மோதலுக்குப் பிறகும் தங்களுக்கிடையே நல்ல நட்பு இருப்பதாகக் கூறியுள்ள டிரம்ப், “நாங்கள் ஒன்றாக இணைந்து சிறப்பாகச் செயல்பட்டுள்ளோம், எனக்கு பிபியை (நெதன்யாகு) மிகவும் பிடிக்கும்” என்றும் குறிப்பிட்டுள்ளார். இந்த உரையாடலுக்குப் பிறகு, பெய்ரூட் மீது பெரிய அளவிலான தாக்குதல்களை நடத்த வேண்டாம் என்ற தனது கோரிக்கையை ஏற்று இஸ்ரேல் படைகள் பின்வாங்கியதாகவும், ஹெஸ்பொல்லா அமைப்பும் இஸ்ரேல் மீதான தாக்குதலை நிறுத்த ஒப்புக்கொண்டுள்ளதாகவும் டிரம்ப் தனது சமூக வலைத்தளப் பக்கத்தில் தெரிவித்துள்ளார்.