மத்தியப் பிரதேசம் ராஜ்கர் மாவட்டத்தில், பணத்தாசையின் உச்சக்கட்டமாக உயிரோடு இருக்கும் சொந்தத் தந்தையையே ஆவணங்களில் இறந்துவிட்டதாகக் காட்டி, வங்கியில் ரூ. 20 லட்சம் கடன் பெற்று மோசடி செய்த கலியுக மகனின் அதிர்ச்சிகரமான செயல் வெளிச்சத்திற்கு வந்துள்ளது. தனது தந்தை இறந்துவிட்டதாகக் கூறி போலியான இறப்புச் சான்றிதழைப் பயன்படுத்திய அந்த நபர், அதன் மூலம் வங்கியைக் ஏமாற்றி இந்த மாபெரும் தொகையைக் கடனாகப் பெற்றுள்ளார்.
உயிரோடு இருக்கும் நபர் ஒருவருக்குப் போலி ஆவணங்கள் மூலம் இறப்புச் சான்றிதழ் தயாரிக்கப்பட்டது எப்படி என்ற கோணத்தில் இந்த மோசடி விவகாரம் பெரும் பரபரப்பை ஏற்படுத்தியுள்ளது. இந்தச் சதித்திட்டத்திற்குப் பின்னால் அரசு அதிகாரிகள் அல்லது போலி ஆவணங்கள் தயாரிக்கும் கும்பலின் பின்னணி இருக்கலாம் என சந்தேகிக்கப்படுகிறது. வங்கியில் பெறப்பட்ட கடனுக்கான தவணைகள் மற்றும் ஆவணங்களைச் சரிபார்க்கும் போதுதான், இந்த மிகப்பெரிய முறைகேடு அதிகாரிகளுக்குத் தெரியவந்துள்ளது.
தனது சொந்த மகனே தன்னை ஆவணங்களில் பிணமாகக் காட்டி ஏமாற்றியதை அறிந்து அதிர்ச்சியடைந்த தந்தை, இதுகுறித்து காவல் நிலையத்தில் புகார் அளித்துள்ளார். தந்தையின் புகாரின் பேரில் உடனடியாக வழக்குப் பதிவு செய்துள்ள போலீசார், உயிரோடு இருக்கும் தந்தையை ‘இறந்தவராக’ சித்தரித்து மோசடி செய்த மகனைக் கைது செய்து தீவிர விசாரணை நடத்தி வருகின்றனர்.