முன்னாள் அமைச்சர் சி. விஜயபாஸ்கர் அதிமுகவில் தொடர்ந்து நீடிப்பதா அல்லது தனது எம்.எல்.ஏ பதவியை ராஜினாமா செய்துவிட்டு தமிழக வெற்றிக் கழகத்தில் (தவெக) இணைவதா என்பது குறித்து தனது ஆதரவாளர்களுடன் தீவிர ஆலோசனையில் ஈடுபட்டுள்ளார். அதிமுகவின் முக்கிய நிர்வாகிகளான எஸ்.பி. வேலுமணி உள்ளிட்டோர் நேற்று கட்சியின் பொதுச்செயலாளர் எடப்பாடி பழனிசாமியை (இபிஎஸ்) நேரில் சந்தித்துப் பேசியுள்ளனர். ஆனால், சி. விஜயபாஸ்கர் மற்றும் சி.வி. சண்முகம் ஆகியோர் மட்டும் இன்னும் அவரைச் சந்திக்கவில்லை என்பது அரசியல் வட்டாரத்தில் தற்பொழுது பெரும் பேசுபொருளாக மாறியுள்ளது.
தமிழக அரசியல் களம் பெரும் மாற்றங்களைச் சந்தித்து வரும் வேளையில், அதிமுகவின் முக்கியப் புள்ளிகள் மாற்றுப் பாதையை நோக்கிச் சிந்திப்பது அக்கட்சியினரிடையே அதிர்ச்சியை ஏற்படுத்தியுள்ளது. தவெகவின் அரசியல் எழுச்சிக்கு மத்தியில், விஜயபாஸ்கரின் இந்த அடுத்தகட்ட அரசியல் நகர்வு குறித்த ஆலோசனை, அதிமுகவின் உட்கட்சிப் பூசலையும் அதன் எதிர்காலக் கூட்டணிக் கணக்குகளையும் மாற்றி அமைக்கும் ஒரு முக்கிய நகர்வாகப் பார்க்கப்படுகிறது.