இந்தியாவின் முன்னணி தகவல் தொழில்நுட்ப நிறுவனமான டாடா கன்சல்டன்சி சர்வீசஸ் (TCS) வெளியிட்டுள்ள புதிய ஆண்டு அறிக்கையின்படி, அதன் தலைமை நிர்வாக அதிகாரி (CEO) மற்றும் நிர்வாக இயக்குநரான கே. கிருத்திவாசனுக்கு 2025-2026 ஆம் நிதியாண்டில் மொத்தமாக ரூ. 28 கோடி ஊதியமாக வழங்கப்பட்டுள்ளது. இது அவர் அதற்கு முந்தைய நிதியாண்டில் பெற்ற ஊதியத்தை விட 6.3 சதவீதம் அதிகமாகும்.
கிருத்திவாசனுக்கு வழங்கப்பட்ட இந்த மொத்த ஊதியத்தின் விவரங்களும் அந்த அறிக்கையில் விரிவாகக் குறிப்பிடப்பட்டுள்ளன. அதன்படி, அவரது மொத்த வருவாயில் ரூ. 1.67 கோடி அடிப்படைச் சம்பளமாகவும் (Base Salary), ரூ. 1.43 கோடி இதர படிகள் மற்றும் சலுகைகளாகவும் (Perquisites & Allowances) வழங்கப்பட்டுள்ளது. இவை தவிர, நிறுவனத்தின் வளர்ச்சிக்கு பங்களித்ததற்கான செயல்திறன் அடிப்படையிலான ஊக்கத்தொகையாக (Performance-linked Incentive) மட்டும் சிஇஓ கிருத்திவாசனுக்கு ரூ. 25 கோடி வழங்கப்பட்டுள்ளது.
டிசிஎஸ் நிறுவனத்தின் உயர் அதிகாரிக்கு வழங்கப்பட்ட இந்த ஊதிய உயர்வோடு, நிறுவனத்தின் ஒட்டுமொத்த ஊழியர்களுக்கான ஊதிய விவரமும் இதில் அறிவிக்கப்பட்டுள்ளது. இந்த நிதியாண்டில் டிசிஎஸ் நிறுவன ஊழியர்களின் சராசரி ஊதிய உயர்வானது கடந்த ஆண்டின் 4.5 சதவீதத்தில் இருந்து, இந்த ஆண்டு 5.1 சதவீதமாக அதிகரித்துள்ளதாக அந்நிறுவனத்தின் சமீபத்திய ஆண்டு அறிக்கை தெளிவுபடுத்தியுள்ளது.