தமிழ் திரையுலகின் முன்னணி நகைச்சுவை நடிகரான முத்துக்காளை, இன்று காலை தனது மனைவியின் உடல்நிலை குறித்து கண்ணீருடன் வீடியோ ஒன்றை வெளியிட்டார். அதில், தனது மனைவிக்கு மூளையில் ரத்தக்கசிவு ஏற்பட்டு உடல்நிலை மிகவும் கவலைக்கிடமாக இருப்பதாகவும், மருத்துவச் செலவுகள் மற்றும் சிகிச்சை தொடர்பான சிக்கல்களால் தங்கள் குடும்பம் கடுமையான மன அழுத்தத்தில் இருப்பதாகவும் தெரிவித்திருந்தார். மேலும், உயிருக்கு போராடும் தனது மனைவியை காப்பாற்ற தமிழக முதலமைச்சர் தங்களுக்கு உதவ வேண்டும் என்று அவர் உருக்கமான வேண்டுகோள் விடுத்திருந்தார்.
இந்த வீடியோ சமூக வலைதளங்களில் வேகமாகப் பரவி பலரின் கவனத்தையும் ஈர்த்த நிலையில், தமிழக முதலமைச்சர் விஜய் இதற்கு உடனடியாக அதிரடி நடவடிக்கை எடுத்தார். முத்துக்காளையின் மனைவிக்கு தேவையான மேல் சிகிச்சைகள் எவ்வித தாமதமும் இன்றி வழங்கப்பட வேண்டும் என்று அதிகாரிகளுக்கு அவர் உத்தரவிட்டார். மேலும், இது தொடர்பாக முத்துக்காளையிடம் தொலைபேசி வாயிலாகப் பேசுமாறு அமைச்சர் ஆதவ் அர்ஜுனாவிற்கு முதலமைச்சர் அறிவுறுத்தியதாக தகவல்கள் வெளியாகியுள்ளன.
முதலமைச்சரின் உத்தரவைத் தொடர்ந்து, அவரது சார்பில் அமைச்சர் ராஜ்மோகன் நேரில் சென்று நடிகர் முத்துக்காளையைச் சந்தித்து ஆறுதல் கூறினார். அவரது மனைவியின் உடல்நிலை குறித்த விவரங்களைக் கேட்டறிந்த அமைச்சர், அரசின் சார்பில் தேவையான அனைத்து உதவிகளும் செய்யப்படும் என்று உறுதியளித்தார். இக்கட்டான சூழ்நிலையில் முதலமைச்சர் விஜய் எடுத்த இந்த விரைவான மற்றும் மனிதநேயமிக்க நடவடிக்கை பொதுமக்களிடையேயும் ரசிகர்களிடையேயும் பெரும் பாராட்டுகளைப் பெற்று வருகிறது.