சட்டமன்றத் தேர்தல் தோல்விக்குப் பிறகு திமுகவின் உட்கட்சி அரசியலில் அதிரடி மாற்றங்கள் நிகழத் தொடங்கியுள்ளன. குறிப்பாக, தமிழக வெற்றிக் கழகம் ஆட்சியைக் கைப்பற்றியுள்ள சூழலில், திமுகவின் அடிப்படை கட்டமைப்பைச் சீரமைக்க அக்கட்சியின் தலைமை தீவிரம் காட்டி வருகிறது. இதன் ஒரு பகுதியாக, அண்ணா அறிவாலயத்தில் இன்று முதல்வர் ஸ்டாலின் தலைமையில் மாவட்டச் செயலாளர்கள் கூட்டம் நடைபெற்று வரும் வேளையில், அதற்கு முன்னோட்டமாக நேற்றிரவு கனிமொழி எம்பி இல்லத்தில் உதயநிதி ஸ்டாலின் மற்றும் சபரீசன் ஆகியோர் பங்கேற்ற ரகசிய ஆலோசனை கூட்டம் அரசியல் வட்டாரத்தில் பெரும் பரபரப்பை ஏற்படுத்தியுள்ளது.
இந்த முக்கியச் சந்திப்பின் போது, திமுகவின் படுதோல்விக்கான காரணங்கள் குறித்து மிக விரிவாக விவாதிக்கப்பட்டதாகத் தெரிகிறது. ஒவ்வொரு தொகுதியிலும் தேர்தல் பணிகளில் சுணக்கம் காட்டிய நிர்வாகிகள் மற்றும் கட்சிக்கு எதிராகச் செயல்பட்டவர்கள் குறித்த பட்டியலை கனிமொழி முன்வைத்ததாகவும், அவர்கள் மீது கடும் நடவடிக்கை எடுக்கப் பரிந்துரைக்க முடிவு செய்யப்பட்டதாகவும் கூறப்படுகிறது. குறிப்பாக, மாவட்டச் செயலாளர்கள் மட்டத்தில் பெரிய அளவிலான மாற்றங்களை மேற்கொண்டு, கட்சியைப் புத்துயிரூட்ட வேண்டியதன் அவசியத்தை மூவரும் ஒருமனதாக ஏற்றுக்கொண்டுள்ளனர்.
முன்பு ஆட்சியில் இருந்தபோது கனிமொழி, உதயநிதி மற்றும் சபரீசன் ஆகிய மூவரும் தனித்தனி குழுக்களாகச் செயல்பட்டு வந்த நிலையில், தற்போது ஏற்பட்டுள்ள தேர்தல் சரிவு அவர்களை ஒன்றிணைக்க வைத்துள்ளது. “இனி வரும் காலங்களில் மூவரும் ஒருங்கிணைந்து செயல்பட வேண்டும்” என்ற ஸ்டாலினின் அறிவுறுத்தலின் பெயரிலேயே இந்தச் சந்திப்பு நிகழ்ந்ததாகத் தெரிகிறது. இந்த மூவர் கூட்டணியின் ஆலோசனையில் எடுக்கப்பட்ட முடிவுகள், இன்று நடைபெறும் மாவட்டச் செயலாளர்கள் கூட்டத்தில் எதிரொலிக்கும் என்றும், விரைவில் பல மாவட்டச் செயலாளர்கள் மற்றும் முக்கிய நிர்வாகிகள் பதவியிழக்க நேரிடும் என்றும் அறிவாலய வட்டாரங்கள் தெரிவிக்கின்றன.