தமிழக சட்டசபை தேர்தல் முடிவுகளுக்குப் பிந்தைய அரசியல் களம், இதுவரை கண்டிராத ஒரு உச்சகட்ட பரபரப்பை எட்டியுள்ளது. தமிழக வெற்றிக் கழகம் (தவெக) ஆட்சி அமைக்க உரிமை கோரியுள்ள நிலையில், அக்கட்சியின் தலைவர் விஜய் ஆளுநரிடம் அளித்த ஆதரவு கடிதத்தில் தனது கட்சியின் பெயரும், மன்னார்குடி எம்.எல்.ஏ காமராஜின் ஆதரவும் இருப்பதாகக் கூறப்படுவது முற்றிலும் பொய் என்று அமமுக பொதுச்செயலாளர் டிடிவி தினகரன் போர்க்கொடி தூக்கியுள்ளார். ஆளுநர் அர்லேகரை நேரில் சந்தித்த தினகரன், தனது எம்.எல்.ஏ-வின் ஆதரவு கடிதத்தை எடப்பாடி பழனிசாமிக்கு (அதிமுக) ஆதரவாக வழங்கியதோடு, விஜய் மீது “ஃபோர்ஜரி” (மோசடி) புகாரையும் முன்வைத்துள்ளார்.
இந்த திடீர் நகர்வு தவெக-வின் ஆட்சி அமைக்கும் கனவிற்குப் பெரும் பின்னடைவாகக் கருதப்படுகிறது. தனது ஆதரவு இல்லாத சூழலில், போலி ஆவணங்களைத் தயாரித்து விஜய் சமர்ப்பித்துள்ளதாக தினகரன் கூறியுள்ள புகார், ஒரு சட்ட ரீதியான முட்டுக்கட்டையாக மாறியுள்ளது. இதனால், பெரும்பான்மையை நிரூபிக்கும் கடிதங்களின் உண்மைத்தன்மையை ஆய்வு செய்ய வேண்டிய கட்டாயத்திற்கு ஆளுநர் தள்ளப்பட்டுள்ளார். இது விஜய்யின் பதவியேற்பு விழாவைத் தற்காலிகமாகத் தள்ளிப்போட வைக்க ஆளுநருக்கு ஒரு வலுவான முகாந்திரத்தைத் தந்துள்ளதாக அரசியல் நோக்கர்கள் கருதுகின்றனர்.
மறுபுறம், விசிக மற்றும் ஐயுஎம்எல் போன்ற கட்சிகளின் ஆதரவு இன்னும் உறுதி செய்யப்படாத நிலையில், திமுக தலைவர் ஸ்டாலினைத் திருமாவளவன் சந்தித்துப் பேசுவது தவெக-விற்கு கூடுதல் நெருக்கடியைக் கொடுத்துள்ளது. 53 இடங்களை வென்றுள்ள அதிமுக முகாமிற்கு, தினகரனின் இந்த அதிரடி ஆதரவு புதிய தெம்பைக் கொடுத்துள்ளது. தவெக-வால் பெரும்பான்மையை நிரூபிக்க முடியாமல் போனால், அடுத்த பெரிய கூட்டணியான அதிமுகவை ஆட்சி அமைக்க ஆளுநர் அழைக்க வாய்ப்பு உள்ளதாகக் கூறப்படுகிறது. குதிரை பேரத்தைத் தவிர்க்க அதிமுக வேட்பாளர்கள் பாதுகாப்பான இடங்களில் தங்கவைக்கப்பட்டுள்ளனர்.
தமிழக வரலாற்றில் 1988-ல் ஜானகி – ஜெயலலிதா இடையே நடந்த போட்டி மற்றும் கூவத்தூர் நிகழ்வுகளைப் போல, தற்போதைய சூழலும் ஒரு ‘செக் மேட்’ அரசியலாக உருவெடுத்துள்ளது. சட்டம் மற்றும் அரசியல் சாசன விதிகளின்படி ஆளுநர் எடுக்கும் முடிவே இறுதியானது என்பதால், ராஜ்பவன் தரப்பிலிருந்து வரும் அதிகாரப்பூர்வ அறிவிப்பை நோக்கி ஒட்டுமொத்த தமிழகமும் ஆவலுடன் காத்திருக்கிறது. பொழுது விடிவதற்குள் தமிழகத்தின் அடுத்த முதல்வர் யார் என்பதில் இன்னும் பல திருப்பங்கள் அரங்கேற வாய்ப்புள்ளதால், அரசியல் களம் கொதிப்பிலேயே நீடிக்கிறது.