சமூக வலைதளங்களில் வைரலாகி வரும் அந்த வீடியோவில், பள்ளிச் சீருடை அணிந்து தோளில் பையுடன் இருக்கும் சிறுவன் ஒருவன், வெயிலின் தாக்கத்தைப் பற்றி மிகவும் அப்பாவித்தனமாகப் பேசுகிறான். 42 டிகிரி செல்சியஸ் வெயிலில், கொளுத்தும் வெயிலையும் பொருட்படுத்தாமல் தாங்கள் தினமும் பள்ளிக்குச் செல்ல வேண்டியிருப்பதாகக் கூறும் அந்தச் சிறுவன், “தயவுசெய்து எங்கள் மீது இரக்கம் காட்டுங்கள், இந்த வெப்பத்தால் எங்களுக்கு உடல்நிலை சரியில்லாமல் போய்விடும்” என்று உருக்கமாகக் கோரிக்கை வைக்கிறான்.
வீடியோவின் சுவாரசியமான பகுதி என்னவென்றால், அந்தச் சிறுவன் தனது எதிர்காலத் திட்டத்தைப் பற்றிப் பேசும் இடம்தான். “நான் பெரியவனாகி நாட்டின் பிரதமரானால், கோடை காலத்தில் பள்ளிக்குச் செல்வதை முழுமையாகத் தடை செய்துவிடுவேன்” என்று அவன் கூறுகிறான். அவனது இந்த மழலை கலந்த அரசியல் சபதம் காண்போரைச் சிரிக்க வைப்பதோடு, கோடை காலத்தில் பள்ளிச் செல்லும் குழந்தைகளின் சிரமத்தை எண்ணிப் பார்க்கவும் வைக்கிறது.
View this post on Instagram
இந்த வீடியோவை நெட்டிசன்கள் பலரும் பகிர்ந்து வருகின்றனர். “இந்தச் சிறுவன் சொல்வதில் நியாயம் இருக்கிறது”, “வருங்காலப் பிரதமர்” எனப் பலரும் நகைச்சுவையாகவும், ஆதரவாகவும் கருத்துகளைப் பதிவிட்டு வருகின்றனர். கடுமையான வெப்ப அலை வீசும் காலங்களில் பள்ளிகளின் நேரத்தை மாற்றியமைக்க வேண்டும் அல்லது விடுமுறை அளிக்க வேண்டும் என்ற விவாதத்தை இந்தச் சிறுவனின் வைரல் வீடியோ மீண்டும் முன்னெடுத்துள்ளது.