தமிழக அரசியலில் 2026 சட்டமன்றத் தேர்தல் முடிவுகள் ஒரு நிலநடுக்கத்தை ஏற்படுத்தியுள்ள சூழலில், 107 இடங்களில் முன்னிலை பெற்றுள்ள நடிகர் விஜய்யின் தமிழக வெற்றிக் கழகத்தை (தவெக) மையமாக வைத்து டெல்லி மேலிடம் ஒரு நுணுக்கமான அரசியல் சதுரங்க ஆட்டத்தைத் தொடங்கியுள்ளது. தற்போதைய நிலவரப்படி எந்தக் கட்சிக்கும் தனிப்பெரும் பெரும்பான்மை கிடைக்காத நிலையில், விஜய்யை ஒரு ‘மைனாரிட்டி’ அரசை அமைக்க அனுமதிப்பதன் மூலம் தமிழகத்தில் ஒரு புதிய அரசியல் பரிசோதனையை மேற்கொள்ள அமித்ஷா திட்டமிட்டுள்ளதாகத் தெரிகிறது. பாமக-வின் ஆதரவு மற்றும் காங்கிரஸ், இடதுசாரி கட்சிகளின் வெளியிலிருந்து கிடைக்கும் ஆதரவுடன் விஜய் ஆட்சிக்கட்டிலில் அமரக்கூடும் என்ற பேச்சுகள் டெல்லி வட்டாரங்களில் பலமாக ஒலித்து வருகின்றன.
இந்த ‘மாஸ்டர் பிளான்’ விஜய்யின் வெற்றிக்கு வழிவகுப்பது போலத் தெரிந்தாலும், இதன் பின்னணியில் திராவிடக் கட்சிகளின் வாக்கு வங்கியை முற்றிலுமாகச் சிதைக்கும் நோக்கம் ஒளிந்திருப்பதாக அரசியல் நோக்கர்கள் கருதுகின்றனர். திமுக மற்றும் அதிமுக ஆகிய இரு துருவ அரசியலுக்கு மாற்றாக விஜய்யை முன்னிறுத்துவதன் மூலம், அந்த இடைவெளியில் பாஜக தனது கால்தடத்தைப் பலப்படுத்திக்கொள்ள கால அவகாசம் தேடுகிறது. விஜய் ஆட்சியை ஒரு ‘டெஸ்ட் ரேட்’ (Test Rat) போலப் பயன்படுத்தி, தமிழக மக்களின் மனநிலையைத் தங்களுக்குச் சாதகமாக மாற்றிக்கொள்ளும் நீண்ட காலத் திட்டத்தை பாஜக வகுத்துள்ளதாகக் கூறப்படுகிறது.
ஆயினும், இந்த ஆட்சி நீண்ட காலம் நீடிக்காது என்பதுதான் இந்தத் திட்டத்தின் அதிர்ச்சிகரமான அம்சம். சுமார் ஒரு ஆண்டு காலத்திற்குள் கூட்டணி முரண்பாடுகள் அல்லது நிர்வாகச் சிக்கல்களைக் காரணம் காட்டி, பாமக போன்ற கட்சிகளின் ஆதரவை வாபஸ் பெறச் செய்வதன் மூலம் ஆட்சியைச் கவிழ்க்க பாஜக திட்டமிடுவதாகத் தகவல்கள் கசிகின்றன. இதன் விளைவாகத் தமிழகத்தில் ஆளுநர் ஆட்சியை அமல்படுத்தி, நேரடியாகத் தமிழகத்தை நிர்வகிப்பதன் மூலம் 2029 மக்களவைத் தேர்தலுக்குத் தயாராவதே அமித் ஷாவின் உண்மையான வியூகமாகப் பார்க்கப்படுகிறது.
விஜய்க்கு அளிக்கப்படும் இந்த வாய்ப்பு ஒரு தங்கக் கிரீடமா அல்லது முள் கிரீடமா என்பது அவரது அரசியல் முதிர்ச்சியில்தான் அடங்கியுள்ளது. ஒருபுறம் பாஜக எதிர்ப்பு கட்சிகள் விஜய்யைப் பயன்படுத்தி திமுக-வைத் தடுக்க நினைத்தாலும், மறுபுறம் பாஜகவின் இந்த மறைமுக நகர்வுகளை அவர்கள் எப்படி எதிர்கொள்ளப் போகிறார்கள் என்பது பெரிய கேள்விக்குறி. தமிழகத்தில் நேரடி அரசியலில் தடம் பதிக்கத் துடிக்கும் டெல்லி மேலிடம், விஜய்யின் அரசியல் எழுச்சியை ஒரு கருவியாக மாற்றத் துடிப்பது மட்டும் நிதர்சனம். வரும் நாட்களில் ஆளுநரின் முடிவுகளும், அமித் ஷாவின் அடுத்தகட்ட நகர்வுகளுமே தமிழகத்தின் எதிர்காலத்தைத் தீர்மானிக்கப் போகின்றன.