அமெரிக்காவின் 250-வது ஆண்டு விழாவைக் கொண்டாடுவதை முன்னிட்டு, அந்நாட்டு அதிபர் டொனால்டு டிரம்ப் அதிரடியான சில மாற்றங்களை அறிவித்துள்ளார். இதன் ஒரு பகுதியாக, அமெரிக்க டாலர் நோட்டுகளில் அதிபர் டிரம்பின் கையொப்பம் இடம்பெற உள்ளது. இந்த புதிய நோட்டுகளின் உற்பத்தி விரைவில் தொடங்கப்பட்டு புழக்கத்திற்கு வரும் என்று எதிர்பார்க்கப்படுகிறது.
டாலர் நோட்டுகள் மட்டுமின்றி, அமெரிக்கக் கடவுச்சீட்டிலும் (Passport) மாற்றங்கள் செய்யப்பட்டுள்ளன. புதிய வடிவமைப்பின்படி, பாஸ்போர்ட்டின் உட்புறப் பக்கங்களில் அதிபர் டிரம்பின் புகைப்படமும், அதன் கீழே தங்க நிறத்தில் அவரது கையொப்பமும் இடம்பெறும் என்று அமெரிக்க வெளியுறவுத்துறை அதிகாரப்பூர்வமாக உறுதிப்படுத்தியுள்ளது. இதனுடன், அமெரிக்காவின் ஸ்தாபகத் தந்தைகளின் வரலாற்று ஓவியம் மற்றொரு பக்கத்தில் இடம்பெறவுள்ளது.
அமெரிக்காவின் சுதந்திர தினமான ஜூலை மாதத்தில் கொண்டாடப்படவுள்ள 250-வது ஆண்டு விழாவை நினைவுகூரும் வகையில், இந்தச் சிறப்பு கடவுச்சீட்டுகள் வரையறுக்கப்பட்ட எண்ணிக்கையில் (Limited Edition) மட்டுமே வெளியிடப்பட உள்ளன. தற்போதுள்ள அமெரிக்க கடவுச்சீட்டுகளில் சுதந்திர தேவி சிலை மற்றும் நிலவில் மனிதன் கால் பதித்த வரலாற்று நிகழ்வுகள் இடம்பெற்றுள்ள நிலையில், இந்த புதிய மாற்றம் வரலாற்றுச் சிறப்புமிக்க ஒன்றாகக் கருதப்படுகிறது.