விஜய்யின் ‘ஜன நாயகன்’ திரைப்படத்தின் தணிக்கை சான்றிதழ் (Censor Certificate) இன்று அல்லது நாளைக்குள் வெளியாகும் என எதிர்பார்க்கப்படுகிறது. முன்னதாக இப்படம் ஏப்ரல் 30-ஆம் தேதி வெளியாகும் என ரசிகர்கள் காத்திருந்த நிலையில், தணிக்கை பணிகளில் ஏற்பட்ட தாமதம் காரணமாக ரிலீஸ் தள்ளிப்போயுள்ளது. குறிப்பாக, அதே தேதியில் தனுஷின் ‘கர’ திரைப்படம் வெளியாவதாலும், படத்தின் பெரும்பகுதி இணையத்தில் கசிந்து தயாரிப்பு நிறுவனத்திற்கு நஷ்டத்தை ஏற்படுத்தியதாலும், திட்டமிட்டபடி படம் வெளியாகவில்லை என்பது உறுதியாகியுள்ளது.
சினிமா வட்டாரத் தகவல்களின்படி, வரும் மே 7 அல்லது மே 8-ஆம் தேதி ‘ஜன நாயகன்’ வெளியாக அதிக வாய்ப்புகள் இருப்பதாகக் கூறப்படுகிறது. மே 14-ஆம் தேதி சூர்யாவின் ‘கருப்பு’ திரைப்படம் வெளியாக உள்ள நிலையில், அதற்கு ஒரு வாரம் முன்பாக ‘ஜன நாயகன்’ வெளியானால் இரண்டு படங்களுக்குமே போதிய வசூல் கிடைக்கும் எனத் தெரிகிறது. விஜய்யின் படத்திற்கு ஒரு வாரம் திரையரங்குகளில் வரவேற்பு இருந்தாலே நஷ்டத்தை ஈடுகட்டி லாபம் ஈட்டிவிட முடியும் என விநியோகஸ்தர்கள் நம்பிக்கை தெரிவிக்கின்றனர்.
திரைப்பட ரிலீஸ் ஒருபுறம் இருக்க, தமிழக சட்டமன்றத் தேர்தல் முடிவுகள் வரும் மே 4-ஆம் தேதி (திங்கட்கிழமை) வெளியாக உள்ளன. தேர்தலில் விஜய்க்குப் பெரும்பான்மை கிடைக்கும் என்ற பேச்சுகள் நிலவுவதால், அவர் மிகுந்த உற்சாகத்துடன் காணப்படுகிறார். இதற்கிடையே, இன்று அதிகாலை திருச்செந்தூர் முருகன் கோயிலுக்குச் சென்று அவர் சாமி தரிசனம் செய்துள்ளார். அரசியல் வெற்றி மற்றும் சினிமா ரிலீஸ் என இரண்டு முக்கிய நிகழ்வுகளும் ஒரே வாரத்தில் வருவதால் விஜய் ரசிகர்கள் பெரும் எதிர்பார்ப்பில் உள்ளனர்.