தெலங்கானா மாநிலம் ஐதராபாத் ஷேக்ஸ்பேட்டைச் சேர்ந்த யேனுமுலா சத்யநாராயணா என்பவர், நடிகை ஆஷு ரெட்டி தனது மகனைத் திருமணம் செய்து கொள்வதாகக் கூறி ஏமாற்றியதாகக் காவல் நிலையத்தில் பரபரப்பு புகார் ஒன்றை அளித்துள்ளார். அந்தப் புகாரில், தனது மகனைத் திருமணம் செய்வதாக வாக்களித்து ரூ.9.35 கோடி மதிப்பிலான ரொக்கம், தங்கம், அடுக்குமாடி குடியிருப்புகள் மற்றும் வாகனங்களைத் தனது பெயரில் ஆஷு ரெட்டி மாற்றிக்கொண்டதாக அவர் குறிப்பிட்டுள்ளார். இந்தப் புகாரின் அடிப்படையில் குற்றப்பிரிவு போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர்.
இந்த விவகாரம் சமூக வலைதளங்களில் பேசுபொருளான நிலையில், நடிகை ஆஷு ரெட்டி தனது எக்ஸ் (X) பக்கத்தில் இதற்குப் பதிலடி கொடுத்துள்ளார். தன் மீது சுமத்தப்பட்டுள்ள குற்றச்சாட்டுகளைத் திட்டவட்டமாக மறுத்துள்ள அவர், தனது அனுமதியின்றி தன்னைப் பற்றி அவதூறான செய்திகளையோ அல்லது தவறான பிரச்சாரங்களையோ பரப்புவோர் மீது கடும் சட்ட நடவடிக்கை எடுக்கப்படும் என்று எச்சரித்துள்ளார். இந்த விவகாரம் தற்போது தெலுங்குத் திரைத்துறையிலும் பொதுவெளியிலும் பெரும் பரபரப்பை ஏற்படுத்தியுள்ளது.