குருகிராமின் செக்டர் 53 பகுதியில் உள்ள தங்கும் விடுதியில் (PG), 29 வயது அரசு ஊழியர் ஒருவர் மர்மமான முறையில் உயிரிழந்தது அப்பகுதியில் பெரும் சோகத்தை ஏற்படுத்தியுள்ளது. நாக்பூரைச் சேர்ந்த இந்த இளைஞர், ஒரு அரசுத் துறையில் பணியாற்றி வந்தார். வழக்கம்போல் இவருடன் அலுவலகம் செல்லும் சக ஊழியர், பலமுறை தொலைபேசியில் அழைத்தும் பதில் வராததால் நேரில் சென்று பார்த்தபோது அறை உட்புறமாகப் பூட்டப்பட்டிருந்தது. காவல்துறையினர் கதவை உடைத்து உள்ளே சென்றபோது, அந்த இளைஞர் சடலமாக மீட்கப்பட்டார்.
சம்பவ இடத்தில் நடத்தப்பட்ட முதற்கட்ட விசாரணையில், அறையில் சில மருந்துப் பொட்டலங்கள் மற்றும் சத்து மாத்திரைகளின் உறைகள் கண்டெடுக்கப்பட்டுள்ளன. அந்த இளைஞருக்கு விரைவில் திருமணம் நடைபெறவிருந்த நிலையில், அவர் தனது வருங்கால மனைவியை நேரில் சந்திக்கத் திட்டமிட்டிருந்ததாகத் தெரிகிறது. அவர் பாலுணர்வைத் தூண்டும் மருந்துகளை அளவுக்கு அதிகமாக உட்கொண்டதால் ஏற்பட்ட மாரடைப்பு மரணத்திற்குத் தொடக்கப் புள்ளியாக இருந்திருக்கலாம் என காவல்துறையினர் சந்தேகிக்கின்றனர்.
அறையில் வலுக்கட்டாயமாக நுழைந்ததற்கான எந்த அடையாளங்களும் இல்லாததால், இது கொலை அல்லது தற்கொலையாக இருக்க வாய்ப்பில்லை என்று கருதப்படுகிறது. இருப்பினும், பிரேதப் பரிசோதனை அறிக்கை வந்த பின்னரே மரணத்திற்கான உண்மையான காரணம் உறுதி செய்யப்படும் என அதிகாரிகள் தெரிவித்துள்ளனர். விரைவில் திருமணக் கோலம் காணவிருந்த இளைஞர், மர்மமான முறையில் உயிரிழந்தது அவரது குடும்பத்தினரிடையேயும் சக ஊழியர்களிடையேயும் பெரும் அதிர்ச்சியை ஏற்படுத்தியுள்ளது.