ஜார்க்கண்ட் மாநிலம் தன்பாத் பகுதியில், உயிரிழந்த தனது தங்கையின் உடலில் இருந்த புழுக்களை அகற்றுவதற்காகவே பிணத்தை எரித்ததாக அண்ணன் அளித்த வாக்குமூலம் பெரும் அதிர்ச்சியை ஏற்படுத்தியுள்ளது. முன்னாள் விஞ்ஞானி ஒருவரின் மகளான லிபிகா குமாரி, கடந்த ஏப்ரல் 7-ம் தேதி உடல்நலக்குறைவால் உயிரிழந்ததாகக் கூறப்படுகிறது.
மேலும் நான்கு நாட்களுக்குப் பிறகு அவரது வீட்டில் இருந்து துர்நாற்றம் வீசியதை அடுத்து, அக்கம்பக்கத்தினர் அளித்த தகவலின் பேரில் வந்த போலீசார், பாதி எரிந்த நிலையில் இருந்த லிபிகாவின் உடலை மீட்டனர். இதுகுறித்து அவரது அண்ணன் பிரணவ் போலீசாரிடம் கூறுகையில், தங்கை இறந்த பிறகு உடலில் புழுக்கள் மொய்க்கத் தொடங்கியதால், அவற்றைப் போக்கவே தீ வைத்ததாகக் கூறி அதிர வைத்துள்ளார்.
இருப்பினும், லிபிகாவின் மரணத்தில் பல்வேறு மர்மங்கள் நீடிக்கின்றன. அண்ணன் பிரணவ் தனக்கு தகவல் தெரிவித்ததாகக் கூறினாலும், அவரது தம்பி பிரத்யுத் தனக்கு எதுவும் தெரியாது என்றும், தான் உடலைப் பார்க்கவே இல்லை என்றும் முரண்பட்ட தகவலைத் தெரிவித்துள்ளார்.
இதனால் தந்தை மறைவுக்குப் பிறகு லிபிகா மன அழுத்தத்தில் இருந்ததாகக் கூறப்படும் நிலையில், அவர் உண்மையில் உடல்நலக்குறைவால் தான் இறந்தாரா அல்லது கொலை செய்யப்பட்டாரா என்ற கோணத்தில் போலீசார் தீவிர விசாரணை நடத்தி வருகின்றனர். சகோதரர்களின் முன்னுக்குப் பின் முரணான வாக்குமூலங்களால் சிக்கலாகியுள்ள இந்த வழக்கின் உண்மைத்தன்மை, பிரேதப் பரிசோதனை முடிவுக்குப் பிறகே தெரியவரும் என எதிர்பார்க்கப்படுகிறது.