தமிழ்ப் புத்தாண்டு மற்றும் தேர்தல் பரப்புரை என இரட்டை நிகழ்வுகளை முன்னிட்டு, சென்னை நீலாங்கரையில் உள்ள நடிகர் விஜய்யின் இல்லம் முன்பு அதிகாலை முதலே ஏராளமான தொண்டர்களும் ரசிகர்களும் திரண்டனர். வழக்கமாக பண்டிகை காலங்களில் ரஜினிகாந்த் போன்ற முன்னணி நடிகர்கள் தங்கள் வீட்டு வாசலில் வந்து ரசிகர்களைச் சந்திப்பது வழக்கம். அதேபோல், விஜய்யைப் பார்க்கவும் நீண்ட நேரமாகக் காத்திருந்த ரசிகர்களுக்கு ஒரு எதிர்பாராத காட்சி காத்திருந்தது. 10 அடிக்கும் மேலான தனது வீட்டு மதில் சுவரின் உட்புறமாக ஏணி போட்டு ஏறிய விஜய், மரக்கிளைகளுக்கு நடுவே நின்றபடி ரசிகர்களைப் பார்த்துக் கையசைத்தார்.
இந்தச் சம்பவம் அங்கிருந்த ரசிகர்களிடையே பெரும் உற்சாகத்தை ஏற்படுத்தினாலும், சமூக வலைதளங்களில் பல்வேறு விவாதங்களைக் கிளப்பியுள்ளது. விஜய் தனது ரசிகர்களைச் சந்திக்கத் தேர்ந்தெடுத்த இந்த “மதில் சுவர்” முறை சற்று விசித்திரமாகப் பார்க்கப்படுகிறது. ஒருபுறம் தனது பாதுகாப்பைக் கருதி அவர் இவ்வாறு செய்திருக்கலாம் என்று கூறப்பட்டாலும், மறுபுறம் ஒரு மக்கள் இயக்கத்தின் தலைவராகப் பார்க்கப்படும் அவர், ரசிகர்களை நேரடியாகச் சந்திக்காமல் சுவரில் ஏறி நின்று பார்ப்பது அவசியம்தானா என்ற கேள்வியும் எழுப்பப்படுகிறது.
விஜய்யைப் பார்ப்பதற்காக அவரது ரசிகர்கள் ஏற்கனவே டிரான்ஸ்பார்மர்கள், பேனர்கள் மற்றும் மரங்களின் மீது ஏறி ஆபத்தான முறையில் முயற்சிப்பதாகப் புகார்கள் உள்ளன. இத்தகைய சூழலில், “தலைவன் எவ்வழியோ தொண்டனும் அவ்வழி” என்பதற்கு ஏற்ப, விஜய்யே சுவரில் ஏறி நின்று கையசைப்பது ரசிகர்களுக்குத் தவறான முன்னுதாரணமாக அமைந்துவிடுமோ என்ற அச்சமும் சமூக ஆர்வலர்களிடையே எழுந்துள்ளது. பாதுகாப்புப் படையினர் புடைசூழ இருக்கும் விஜய், முறையாக வெளியே வந்து ரசிகர்களைச் சந்தித்திருக்கலாம் என்பதே பலரின் கருத்தாக இருக்கிறது.
ரசிகர்களைச் சந்தித்த கையோடு, விஜய் அங்கிருந்து சென்னை விமான நிலையம் புறப்பட்டுச் சென்றார். அங்கிருந்து அவர் அவிநாசிக்குத் தனது அரசியல் பரப்புரைக்காகப் பயணம் மேற்கொண்டார். திரையுலகைத் தாண்டி அரசியலில் கால் பதித்துள்ள விஜய்யின் ஒவ்வொரு அசைவும் உன்னிப்பாகக் கவனிக்கப்படும் நிலையில், இந்த “ஏணி சந்திப்பு” நெகிழ்ச்சியை விட அதிர்ச்சியையே அதிகம் ஏற்படுத்தியுள்ளது. ரசிகர்களின் அன்பை மதிப்பதோடு, அவர்களின் பாதுகாப்பையும் உறுதி செய்யும் வகையில் எதிர்காலச் சந்திப்புகள் அமைய வேண்டும் என்பதே பொதுவான எதிர்பார்ப்பாகும்.