தமிழக வெற்றிக் கழகத் தலைவர் விஜய்யின் கடைசித் திரைப்படமான ‘ஜன நாயகன்’ இணையத்தில் கசிந்த விவகாரம், தற்போது அரசியல் களத்தில் பெரும் புயலைக் கிளப்பியுள்ளது. இந்தப் படத்தில் இஸ்லாமியர்கள் தவறாகச் சித்தரிக்கப்பட்டுள்ளதாகக் குற்றம் சாட்டியுள்ள முஸ்லிம் மக்கள் கழகத் தலைவர் ஜைனுதீன், 2026 சட்டமன்றத் தேர்தலில் தவெக-வுக்கு அளித்த ஆதரவை அதிகாரப்பூர்வமாகத் திரும்பப் பெறுவதாக அறிவித்துள்ளார். படத்தில் இடம்பெற்றுள்ள சில காட்சிகள் மத உணர்வுகளைப் புண்படுத்தும் வகையில் இருப்பதாகக் குறிப்பிட்ட அவர், இஸ்லாமிய மக்கள் யாரும் தவெக-வுக்கு வாக்களிக்க வேண்டாம் எனவும் வேண்டுகோள் விடுத்துள்ளார்.
தேர்தல் நெருங்கும் வேளையில் ஜைனுதீன் எடுத்துள்ள இந்த அதிரடி முடிவு, விஜய் மற்றும் தவெக நிர்வாகிகளிடையே கடும் அதிர்ச்சியை ஏற்படுத்தியுள்ளது. ஏற்கனவே சென்சார் போர்டு சிக்கல்கள் மற்றும் இணையக் கசிவு போன்ற பிரச்சினைகளால் ‘ஜன நாயகன்’ திரைப்படம் முடங்கியுள்ள நிலையில், இந்த அரசியல் ரீதியான எதிர்ப்பு கட்சிக்கு பின்னடைவாகக் கருதப்படுகிறது. இஸ்லாமிய அமைப்புகளின் அதிருப்தியைச் சரிசெய்ய விஜய் தரப்பு பேச்சுவார்த்தையில் ஈடுபடலாம் என எதிர்பார்க்கப்படும் நிலையில், தவெக-வின் தேர்தல் வியூகங்களில் இது ஒரு முக்கியமான திருப்பமாக அமைந்துள்ளது.