இந்தியர்களுக்கு பெரிய பாதிப்பு… ஒரே உத்தரவால் மொத்தமாக அதிர வைத்த துபாய்…. ஷாக் நியூஸ்….!

துபாய் சர்வதேச விமான நிலையம் மற்றும் அல் மக்தூம் விமான நிலையம் ஆகியவற்றிற்கு வரும் வெளிநாட்டு விமானங்களுக்கு, துபாய் விமான போக்குவரத்து ஆணையம் அதிரடியாகக் கட்டுப்பாடுகளை விதித்துள்ளது. வரும் ஏப்ரல் 20 முதல் மே 31 வரை, ஒரு வெளிநாட்டு விமான நிறுவனம் ஒரு நாளைக்கு ஒரு முறை மட்டுமே துபாய்க்கு வந்து செல்ல அனுமதி வழங்கப்பட்டுள்ளது. மத்திய கிழக்கில் நிலவும் அசாதாரண சூழலைக் காரணம் காட்டி இந்த நடவடிக்கை எடுக்கப்பட்டுள்ள நிலையில், இது இந்திய விமான நிறுவனங்களுக்குப் பெரும் வருவாய் இழப்பை ஏற்படுத்தும் என்று அஞ்சப்படுகிறது.

இந்தத் திடீர் தடையால் ஏர் இந்தியா, இண்டிகோ மற்றும் ஸ்பைஸ்ஜெட் போன்ற நிறுவனங்கள் கடுமையாகப் பாதிக்கப்பட்டுள்ளன. ஏப்ரல் மற்றும் மே மாதங்களில் மட்டும் நூற்றுக்கணக்கான விமானச் சேவைகளை இயக்கத் திட்டமிட்டிருந்த இந்த நிறுவனங்கள், தற்போது அவற்றை ரத்து செய்ய வேண்டிய கட்டாயத்திற்குத் தள்ளப்பட்டுள்ளன. துபாயைப் பயன்படுத்தும் சர்வதேசப் பயணிகளில் இந்தியர்களே முதலிடத்தில் உள்ள நிலையில், இந்த கட்டுப்பாடு இந்திய நிறுவனங்களின் சந்தைப் பங்கீட்டைப் பெருமளவு பாதிக்கும் எனத் தெரிகிறது.

இந்திய விமான நிறுவனங்கள் இத்தகைய ஒருதலைப்பட்சமான கட்டுப்பாட்டிற்குத் தங்களின் கடும் எதிர்ப்பைப் பதிவு செய்துள்ளன. வெளிநாட்டு நிறுவனங்களுக்குக் கட்டுப்பாடுகளை விதிக்கும் துபாய் அரசு, அந்நாட்டைச் சேர்ந்த எமிரேட்ஸ் போன்ற நிறுவனங்களுக்கு எந்தத் தடையுமின்றி இந்தியாவுக்குப் பல சேவைகளை இயக்க அனுமதிப்பது முறையல்ல எனப் புகார்கள் எழுந்துள்ளன. “இது சமமான போட்டிச் சூழலைச் சிதைக்கிறது” எனக் கூறும் இந்திய நிறுவனங்கள், துபாய் அரசு இம்முடிவைத் திரும்பப் பெறாவிட்டால், இந்தியாவிற்கு வரும் துபாய் விமானங்களுக்கும் இதேபோன்ற கட்டுப்பாடுகளை விதிக்க வேண்டும் என மத்திய அரசை வலியுறுத்தியுள்ளன.

பாகிஸ்தான் வான்பாதை மூடல் மற்றும் கச்சா எண்ணெய் விலை உயர்வு போன்ற சவால்களுக்கு இடையே, இந்தத் தடை இந்திய நிறுவனங்களுக்குப் பேரிடியாக அமைந்துள்ளது. விமானச் சேவைகள் குறைவதால் டிக்கெட் விலை பல மடங்கு உயரக்கூடும், இது விடுமுறை காலங்களில் தாயகம் திரும்பும் இந்தியப் பயணிகளுக்குப் பெரும் நிதிச் சுமையை ஏற்படுத்தும். எனவே, இந்திய சிவில் விமானப் போக்குவரத்து அமைச்சகம் உடனடியாகத் தலையிட்டு, ராஜாங்க ரீதியாகப் பேச்சுவார்த்தை நடத்தி இந்தச் சிக்கலுக்குத் தீர்வு காண வேண்டும் என்பதே பொதுவான கோரிக்கையாக உள்ளது.