உத்தரப் பிரதேச மாநிலம் பஸ்தி மாவட்டத்தில் உள்ள முண்டேவா பகுதியில், தனது நிச்சயதார்த்தம் செய்யப்பட்டவருடன் கோயிலுக்குச் சென்று கொண்டிருந்த இளம்பெண் ஒருவர் ஐந்து பேரால் கடத்தப்பட்டு, கூட்டு பாலியல் வன்கொடுமைக்கு உள்ளாக்கப்பட்டுள்ள அதிர்ச்சிகரமான சம்பவம் வெளிச்சத்திற்கு வந்துள்ளது. பாதிக்கப்பட்ட பெண்ணும் அவரது வருங்கால கணவரும் ஒரு மாந்தோப்புக்கு வலுக்கட்டாயமாக கடத்திச் செல்லப்பட்டனர். அங்கு அந்த இளைஞரின் கண்ணெதிரிலேயே அப்பெண்ணை நிர்வாணப்படுத்தி, ஐந்து பேரும் கூட்டு பாலியல் வன்கொடுமையில் ஈடுபட்டுள்ளனர். மேலும், இந்த கொடூரச் செயலை அவர்கள் வீடியோவாகவும் பதிவு செய்துள்ளனர்.
பாதிக்கப்பட்ட பெண் காவல்துறையிடம் அளித்த வாக்குமூலத்தில், “அவர்கள் எங்களை அடித்தனர். எங்களுக்குத் திருமணம் நிச்சயமாகிவிட்டதாகக் கூறியும் அவர்கள் கேட்கவில்லை. அவர்கள் எனது பெற்றோரிடமும், வருங்கால கணவரின் பெற்றோரிடமும் தொலைபேசியில் பேசினர். அதன் பிறகு, எங்களை கோயிலுக்கு அழைத்துச் செல்வதாகக் கூறி பைக்குகளில் ஏற்றிக்கொண்டு ஒரு பாழடைந்த தோட்டத்திற்கு அழைத்துச் சென்றனர். அங்கு எங்களைச் சாதி ரீதியாக இழிவுபடுத்திப் பேசியதோடு, ஐந்து பேரும் வரிசையாக என்னை வன்கொடுமை செய்தனர்,” என்று கண்ணீருடன் தெரிவித்துள்ளார். இந்தச் சம்பவத்தை யாரிடமாவது சொன்னால், வீடியோவை இணையத்தில் பரப்பிவிடுவதாகக் கூறி அவர்கள் மிரட்டியுள்ளனர்.
இந்த கொடூரச் சம்பவம் தொடர்பாக வழக்குப் பதிவு செய்துள்ள காவல்துறையினர், சிவபூஜா, சுக்ரீவ், சச்சின் மற்றும் பவன் ஆகிய நான்கு பேரைத் தீவிர தேடுதல் வேட்டைக்குப் பிறகு கைது செய்து சிறையில் அடைத்துள்ளனர். தப்பியோடிய ஐந்தாவது குற்றவாளியைப் பிடிக்கத் தனிப்படை அமைக்கப்பட்டுள்ளது. கோயிலுக்குச் சென்ற இடத்தில் ஒரு ஜோடிக்கு நேர்ந்த இந்தத் துயரச் சம்பவம் அப்பகுதியில் பெரும் கொந்தளிப்பையும் சோகத்தையும் ஏற்படுத்தியுள்ளது.