மத்தியப் பிரதேச மாநிலம் கார்கோன் மாவட்டத்தில், மனைவியைக் கொலை செய்துவிட்டு இரண்டு நாட்களாக சடலத்துடன் கணவன் வீட்டிற்குள்ளேயே தங்கியிருந்த அதிர்ச்சி சம்பவம் வெளிச்சத்திற்கு வந்துள்ளது. 38 வயதான ஜெகதீஷ் என்பவருக்கு ஏற்கனவே திருமணமாகி நான்கு குழந்தைகள் உள்ள நிலையில், தனது மாணவியின் சகோதரியான 25 வயது ரீமாபாயை இரண்டாவதாகத் திருமணம் செய்துள்ளார். இதனால் முதல் மனைவி கோபித்துக்கொண்டு தாய் வீட்டிற்குச் சென்ற நிலையில், ஜெகதீஷ் தனது இரண்டாவது மனைவி மற்றும் இரு குழந்தைகளுடன் வசித்து வந்தார்.
கூலி வேலை செய்து வந்த ஜெகதீஷிற்கும் ரீமாபாய்க்கும் இடையே குடும்பப் பிரச்சனைகள் காரணமாக அடிக்கடி தகராறு ஏற்பட்டுள்ளது. ரீமாபாய் சரியான நேரத்திற்குச் சமைக்காமல் குழந்தைகளைக் கவனிக்கவில்லை எனக் கூறி ஜெகதீஷ் சண்டையிட்டு வந்துள்ளார். பெரியோர்கள் பலமுறை சமாதானம் செய்தும் சண்டைகள் ஓய்ந்தபாடில்லை. இந்த நிலையில், கடந்த சில நாட்களுக்கு முன்பு ஏற்பட்ட கடும் வாக்குவாதத்தில் ஆத்திரமடைந்த ஜெகதீஷ், ரீமாபாயைக் கட்டையால் சரமாரியாகத் தாக்கியுள்ளார். இதில் ரீமாபாய் சம்பவ இடத்திலேயே ரத்த வெள்ளத்தில் உயிரிழந்தார்.
கொலை செய்த பிறகு எவ்விதப் பதற்றமும் இன்றி, மனைவியின் உடலைக் கட்டிலில் உறங்குவது போல் கிடத்திய ஜெகதீஷ், தனது இரு குழந்தைகளை அடுத்த அறையில் உறங்க வைத்துள்ளார். பின்னர் தானும் மனைவியின் சடலத்திற்கு அருகிலேயே இரண்டு நாட்கள் படுத்து உறங்கியுள்ளார். வீடு பூட்டப்பட்டு இரண்டு நாட்களாகியும் அவர்கள் வெளியே வராததாலும், வீட்டிலிருந்து துர்நாற்றம் வீசியதாலும் சந்தேகமடைந்த ஜெகதீஷின் தந்தை போலீசாருக்குத் தகவல் அளித்தார். விரைந்து வந்த போலீசார் கதவை உடைத்து உள்ளே சென்றபோது, அழுகிய நிலையில் ரீமாபாயின் சடலம் கண்டெடுக்கப்பட்டது.
இந்தக் கொடூரச் செயல் குறித்து வழக்குப் பதிவு செய்த போலீசார் ஜெகதீஷைக் கைது செய்து விசாரணை நடத்தினர். விசாரணையில், ஆத்திரத்தில் மனைவியைக் கொன்றதையும், பிணத்துடனேயே இரண்டு நாட்கள் வசித்ததையும் அவர் ஒப்புக்கொண்டார். கைதான ஜெகதீஷ் நீதிமன்றத்தில் ஆஜர்படுத்தப்பட்டுச் சிறையில் அடைக்கப்பட்டார். குடும்பத் தகராறில் மனைவியைக் கொன்று சடலத்துடன் கணவன் குடும்பம் நடத்திய இந்தச் சம்பவம் அந்தப் பகுதியில் பெரும் பரபரப்பையும் அச்சத்தையும் ஏற்படுத்தியுள்ளது.