மும்பை தஹிசர் பகுதியில் உள்ள ஒரு குடியிருப்பு வளாகத்தில், நாய் சிறுநீர் கழித்த விவகாரத்தில் 58 வயது நபர் ஒருவர் செல்லப் பிராணியையும் அதன் பெண் உரிமையாளரையும் தாக்கிய சம்பவம் பெரும் அதிர்ச்சியை ஏற்படுத்தியுள்ளது. ஏப்ரல் 4 அன்று ஓம் சூர்யோதய் ஹவுசிங் சொசைட்டியில் நடந்த இந்த மோதலில், ராஜேந்திர கடேகர் என்பவர் ஒரு வாகனத்தின் டயரில் சிறுநீர் கழித்த பீகிள் வகை நாயின் வயிற்றில் பலமாக உதைத்துள்ளார். இந்தச் சம்பவம் அங்கிருந்த சிசிடிவி கேமராவில் பதிவாகி சமூக வலைதளங்களில் வைரலாகி வருகிறது.
நாயின் உரிமையாளர் நிதி கன்னா தனது செல்லப் பிராணியைப் பாதுகாக்க முயன்றபோது, குற்றம் சாட்டப்பட்ட கடேகர் அவரை அறைந்து, இழிவான வார்த்தைகளால் திட்டியதாகக் கூறப்படுகிறது. விலங்கு ஆர்வலர் மீதா மல்வண்கரின் உதவியுடன், பாதிக்கப்பட்ட பெண் தஹிசர் காவல் நிலையத்தில் புகார் அளித்துள்ளார். பட்டப்பகலில் நடந்த இந்த ஆக்ரோஷமான தாக்குதல் மற்றும் பெண்ணைத் தாக்கிய விதம் குறித்து விலங்கு நல ஆர்வலர்கள் தங்களது கடும் கண்டனங்களைப் பதிவு செய்து வருகின்றனர்.
இந்தச் புகாரைத் தொடர்ந்து, தஹிசர் போலீசார் ராஜேந்திர கடேகர் மீது பாரதிய நியாய சம்ஹிதா (BNS) 2023 மற்றும் 1960 ஆம் ஆண்டின் விலங்குகள் மீதான கொடுமையைத் தடுக்கும் சட்டத்தின் கீழ் வழக்குப் பதிவு செய்துள்ளனர். செல்லப் பிராணிகள் மற்றும் விலங்குகள் மீதான இத்தகைய வன்முறைகளைக் குறைக்க கடுமையான சட்ட நடவடிக்கை தேவை என சமூக ஆர்வலர்கள் கோரிக்கை விடுத்துள்ளனர். இந்தச் சம்பவம் குறித்து போலீசார் மேலதிக விசாரணையைத் தீவிரப்படுத்தியுள்ளனர்.