தமிழக அமைச்சரவையில் தகவல் தொழில்நுட்பத் துறை அமைச்சராக இருந்த மனோ தங்கராஜுக்கு, இந்த முறை சட்டமன்றத் தேர்தலில் போட்டியிட வாய்ப்பு மறுக்கப்பட்டிருப்பது அரசியல் வட்டாரத்தில் பெரும் அதிர்ச்சியை ஏற்படுத்தியுள்ளது. அவர் தற்போது பிரதிநிதித்துவப்படுத்தும் பத்மநாபபுரம் தொகுதி, திமுக கூட்டணியில் உள்ள சிபிஎம் (CPM) கட்சிக்கு ஒதுக்கப்பட்டுள்ளது. கடந்த 2006-ஆம் ஆண்டு முதல் திமுகவின் கோட்டையாகத் திகழ்ந்த இந்தத் தொகுதியை, சிபிஎம்-க்குத் தாரைவார்த்ததன் மூலம் மனோ தங்கராஜின் அரசியல் வாய்ப்பு முற்றிலுமாகப் பறிபோயுள்ளது.
அமைச்சர் மனோ தங்கராஜ் மீது கடந்த காலங்களில் பல்வேறு நிர்வாக ரீதியான விமர்சனங்களும், கட்சிக்குள்ளேயே புகார்களும் எழுந்து வந்தன. தொகுதியில் அவருக்கு இருந்த அதிருப்தி மற்றும் ஆளுங்கட்சி மீதான எதிர்மறை விமர்சனங்களைத் தவிர்க்கும் பொருட்டு, திமுக தலைமை இந்த அதிரடி முடிவை எடுத்துள்ளதாகக் கருதப்படுகிறது. செல்வாக்கு மிக்க ஒரு அமைச்சருக்கே சீட் வழங்கப்படாதது, திமுகவின் வேட்பாளர் தேர்வில் நிலவும் கண்டிப்பையும், கூட்டணி கட்சிகளுடனான தொகுதிப் பங்கீட்டில் ஏற்பட்டுள்ள சமரசங்களையும் வெளிச்சம் போட்டுக் காட்டுகிறது.