அதிமுகவுடனான தொகுதிப் பங்கீடு பேச்சுவார்த்தை தோல்வியில் முடிந்ததைத் தொடர்ந்து, கிருஷ்ணசாமி தலைமையிலான புதிய தமிழகம் கட்சி வரும் தேர்தலைத் தனித்துப் போட்டியிட முடிவு செய்துள்ளது. இந்தச் சூழலில், தேசிய ஜனநாயகக் கூட்டணியுடனும் (NDA) தங்களுக்குத் தற்போது எந்தத் தொடர்பும் இல்லை என்று திட்டவட்டமாகத் தெரிவித்துள்ள அவர், ஒருவேளை விஜய் தலைமையிலான தமிழக வெற்றிக் கழகம் (தவெக) தங்களை அணுகினால், அவர்களுடன் கூட்டணி அமைப்பது குறித்துப் பரிசீலிக்கத் தயாராக இருப்பதாகக் கூறி அரசியல் வட்டாரத்தில் புதிய விவாதத்தைக் கிளப்பியுள்ளார்.
மேலும், அதிமுகவின் தற்போதைய நிலையை மிகக் கடுமையாக விமர்சித்துள்ள கிருஷ்ணசாமி, தென் தமிழகத்தில் சுமார் 50 முதல் 60 தொகுதிகளில் அக்கட்சி டெபாசிட் கூட வாங்க முடியாத அளவிற்குப் பின்னடைவைச் சந்திக்கும் என்றும் அதிரடியாகக் கணித்துள்ளார்.