2026 தமிழக சட்டமன்றத் தேர்தல் களம் தற்போதே அனல் பறக்கத் தொடங்கியுள்ளது. ஆளுங்கட்சியான திமுக தனது கூட்டணிப் பேச்சுவார்த்தைகளை நிதானமாக நகர்த்தி வரும் சூழலில், அதிமுக பொதுச்செயலாளர் எடப்பாடி பழனிசாமி முன்கூட்டியே தொகுதிப் பங்கீட்டை நிறைவு செய்து அரசியல் வட்டாரத்தில் பரபரப்பை ஏற்படுத்தியுள்ளார். அதிமுக தலைமையிலான கூட்டணியில் பாஜகவுக்கு 27 தொகுதிகளும், பாமகவுக்கு 18 தொகுதிகளும், அமமுகவுக்கு 11 தொகுதிகளும் ஒதுக்கப்பட்டுள்ளன. இது தவிர ஜி.கே.வாசனின் தமாகாவிற்கு 5 இடங்களும், ஐஜேகேவுக்கு 2 இடங்களும் வழங்கப்பட்டுள்ளன.
இந்தத் தொகுதிப் பங்கீட்டில் எடப்பாடி பழனிசாமி மிகவும் சாதுர்யமான காய்நகர்த்தல்களை மேற்கொண்டுள்ளதாக அரசியல் விமர்சகர்கள் கருதுகின்றனர். குறிப்பாக, பாஜகவுக்கு ஒதுக்கப்பட்ட 27 தொகுதிகளில் பெரும்பாலானவை கடந்த தேர்தல்களில் அதிமுக தோல்வியைத் தழுவிய இடங்களாகும். கடந்த 2021 தேர்தலில் இந்த 27 தொகுதிகளில் அதிமுக மற்றும் பாஜக தலா 2 இடங்களை மட்டுமே கைப்பற்றின. வெற்றி வாய்ப்பு குறைவாக உள்ள மற்றும் சவாலான தொகுதிகளைக் கூட்டணிக் கட்சிகளுக்கு ஒதுக்கியதன் மூலம், அதிமுகவின் வெற்றி விகிதத்தை (Strike Rate) அதிகரிக்க இபிஎஸ் திட்டமிட்டுள்ளார்.
பாஜகவுக்கு வழங்கப்பட்டுள்ள தொகுதிகளில் அவிநாசி போன்ற அதிமுகவின் கோட்டை எனக் கருதப்படும் சில இடங்களும் அடக்கம். இது ஒருபுறம் விமர்சனங்களை எழுப்பினாலும், மறுபுறம் ஒட்டன்சத்திரம் போன்ற இதுவரை அதிமுக வெற்றி பெறாத தொகுதிகளைத் தமிழ் மாநில காங்கிரஸ் போன்ற தோழமைக் கட்சிகளுக்கு வழங்கியிருப்பது கவனிக்கத்தக்கது. இதன் மூலம் கடினமான தொகுதிகளில் கூட்டணிக் கட்சிகளின் பலத்தைப் பரிசோதிக்கும் அதே வேளையில், அதிமுகவின் நேரடிப் போட்டியை வலுவான இடங்களுக்குள் சுருக்கியுள்ளார் எடப்பாடி பழனிசாமி.
மொத்தமுள்ள 234 தொகுதிகளில் அதிமுக நேரடியாக 169 இடங்களில் களம் காண உள்ளது. குறிப்பாக மேற்கு மண்டலம், டெல்டா மற்றும் தென் மாவட்டங்களில் அதிமுக மரபு ரீதியாகப் பலமாக இருக்கும் தொகுதிகளைத் தன் வசமே வைத்துக்கொண்டுள்ளது. கூட்டணிக் கட்சிகளில் சில தாமரைச் சின்னத்திலேயே போட்டியிட வாய்ப்புள்ளதாகக் கூறப்படும் நிலையில், எடப்பாடியின் இந்தத் துரிதமான முடிவுகள் திமுக கூட்டணியை விட தேர்தல் வேலைகளில் அதிமுகவை ஒரு படி முன்னே நிற்க வைத்துள்ளது.
நடிகர் விஜய்யின் அரசியல் வருகை ஒருபுறம் தாக்கத்தை ஏற்படுத்தி வரும் நிலையில், எடப்பாடி பழனிசாமி தனது தேர்தல் வியூகத்தை மிகத் தெளிவாக வகுத்துள்ளார். தோல்வியடைந்த தொகுதிகளைக் கூட்டணிக் கட்சிகளுக்குப் பகிர்ந்தளித்துவிட்டு, வெற்றி வாய்ப்புள்ள 169 தொகுதிகளில் கவனம் செலுத்துவதன் மூலம் ஆட்சியைப் பிடிக்கும் முனைப்பில் அதிமுக தீவிரம் காட்டி வருகிறது. திமுக இன்னும் தொகுதிப் பங்கீட்டை இறுதி செய்யாத நிலையில், அதிமுகவின் இந்த வேகம் வரும் தேர்தலில் முக்கியத் திருப்பமாக அமையும் என எதிர்பார்க்கப்படுகிறது.