தமிழக அரசியலில் அதிமுக தலைமையிலான கூட்டணியில் தொகுதிப் பங்கீடு இறுதிக்கட்டத்தை எட்டியுள்ள நிலையில், பாரதிய ஜனதா கட்சிக்கு 27 தொகுதிகள் ஒதுக்கீடு செய்யப்பட்டுள்ளது பெரும் விவாதத்தையும் ஆச்சரியத்தையும் ஏற்படுத்தியுள்ளது. திமுக கூட்டணியில் காங்கிரஸ் கட்சிக்கு வழங்கப்பட்டுள்ள தொகுதிகளுக்கு இணையாக இடங்களைப் பெற வேண்டும் என்பதில் உறுதியாக இருந்த பாஜக, இறுதியில் இந்த எண்ணிக்கையை எட்டியுள்ளது.
மேலும் கடந்த 2021 தேர்தலில் 20 இடங்களில் போட்டியிட்ட பாஜக, இந்த முறை கூடுதலாக 7 இடங்களைப் பெற்றுள்ளதோடு, குறிப்பாக தென் மாவட்டங்களில் தனது செல்வாக்கை நிரூபிக்க அதிமுகவின் கோட்டைகளாகக் கருதப்படும் முக்கியத் தொகுதிகளையும் கைப்பற்றியுள்ளது அக்கட்சியினரிடையே பெரும் உற்சாகத்தை ஏற்படுத்தியுள்ளது.
இந்த தொகுதிப் பங்கீட்டின்படி கன்னியாகுமரி, நெல்லை, தென்காசி மற்றும் மதுரை உள்ளிட்ட தென் மாவட்டங்களில் பாஜக தனது முழு பலத்தையும் பிரயோகிக்கத் திட்டமிட்டுள்ளது. குறிப்பாக விளவங்கோடு, பத்மநாபபுரம், கிள்ளியூர், ராதாபுரம் மற்றும் விருதுநகர் போன்ற தொகுதிகள் பாஜகவின் இலக்காக மாறியுள்ளன.
இதனால் சட்டசபையில் தனது பலத்தை இரட்டை இலக்கத்திற்கு உயர்த்துவதை நோக்கமாகக் கொண்டுள்ள பாஜகவிற்கு, இந்த 27 தொகுதிகள் ஒரு ஜாக்பாட்டாகவே பார்க்கப்படுகிறது. அதே சமயம், அதிமுக தனது வாக்கு வங்கியைச் சிதறவிடாமல் இருக்கவும், கூட்டணிக் கட்சிகளின் பலத்தைப் பயன்படுத்தி ஆளுங்கட்சியை வீழ்த்தவும் இந்த வியூகத்தை வகுத்துள்ளது, தேர்தல் களத்தில் ஒரு பலப்பரீட்சையை உருவாக்கும் என எதிர்பார்க்கப்படுகிறது.