தமிழக அரசியலில் திமுக மற்றும் அதிமுக ஆகிய இரு கட்சிகளும் வாக்காளர்களுக்கு யார் அதிகப் பணம் கொடுக்கிறார்கள் என்ற போட்டியில்தான் ஈடுபட்டுள்ளதாக நாம் தமிழர் கட்சியின் ஒருங்கிணைப்பாளர் சீமான் கடுமையாக விமர்சித்துள்ளார்.
திமுக, அதிமுக மற்றும் தமிழக வெற்றிக் கழகம் ஆகிய மூன்று கட்சிகளுமே இலவசங்களை வாரி வழங்கி மக்களை ஏமாற்றும் ‘சூலாயுதமாக’ச் செயல்படுவதாகக் குறிப்பிட்ட அவர், இதற்கு மாற்றாகத் தற்சார்பு வாழ்வியல் மற்றும் தற்சார்பு பொருளாதாரத்தை முன்வைத்து நாம் தமிழர் கட்சி ‘வேலாயுதமாக’ப் பாய்ந்து அவர்களை எதிர்க்கும் என்று ஆவேசமாகத் தெரிவித்துள்ளார். தற்போதைய தேர்தல் களம் என்பது ஊழல் அரசியலுக்கும் நேர்மையான அரசியலுக்கும் இடையிலான ஒரு நேரடிப் போட்டி என்பதால், வரவிருக்கும் தேர்தலில் இருமுனைப் போட்டிதான் நிலவும் எனவும் அவர் திட்டவட்டமாகக் கூறியுள்ளார்.