தமிழகச் சட்டமன்றத் தேர்தல் ஏப்ரல் 23-ஆம் தேதி நடைபெறவுள்ள நிலையில், ஆளுங்கட்சியான திமுக வேட்பாளர் தேர்வுப் பணிகளைத் தீவிரப்படுத்தியுள்ளது. இதில் வியக்கத்தக்க விஷயமாக, ஏழு முக்கியமான தொகுதிகளில் தலா ஒருவரைத் தவிர வேறு யாரும் போட்டியிட விருப்பமனு அளிக்கவில்லை. இதன் மூலம் முதலமைச்சர் மு.க.ஸ்டாலின் (கொளத்தூர்), துணை முதலமைச்சர் உதயநிதி ஸ்டாலின் (சேப்பாக்கம்-திருவல்லிக்கேணி) மற்றும் மூத்த அமைச்சர்களான கே.என்.நேரு, ஐ.பெரியசாமி, சக்கரபாணி, தங்கம் தென்னரசு, மூர்த்தி ஆகியோர் அவர்கள் நின்ற தொகுதிகளிலேயே மீண்டும் களம் காண்பது உறுதியாகியுள்ளது.
மற்ற தொகுதிகளில் கடும் போட்டி நிலவினாலும், உட்கட்சி ரகசியக் கணிப்புகளின்படி மக்கள் அதிருப்தியில் உள்ள சில எம்.எல்.ஏ-க்களுக்கு இந்த முறை சீட் மறுக்கப்பட வாய்ப்புள்ளதாகத் தெரிகிறது. அதேபோல், இளைஞரணியைச் சேர்ந்த புதிய முகங்களுக்கு அதிக வாய்ப்பளிக்க வேண்டும் என்பதில் உதயநிதி ஸ்டாலின் உறுதியாக உள்ளார். அதிமுக, நாம் தமிழர் மற்றும் விஜய்யின் தமிழக வெற்றிக் கழகம் எனப் பலமுனைப் போட்டி நிலவுவதால், இந்தத் தேர்தல் திமுகவிற்கு ஒரு மிகப்பெரிய சவாலாகவே இருக்கும் என்று அரசியல் வட்டாரங்கள் கணிக்கின்றன.