பீகார் மாநிலம் அவுரங்காபாத் மாவட்டத்தில், 9 மாதக் குழந்தையே சாட்சியாக நிற்க, பாலியல் வன்கொடுமை வழக்கில் சிறையிலிருந்த இளைஞருக்கும் பாதிக்கப்பட்ட பெண்ணுக்கும் திருமணம் நடைபெற்ற நெகிழ்ச்சியான மற்றும் பரபரப்பான சம்பவம் நடந்துள்ளது. பாதிக்கப்பட்ட பெண் மைனராக இருந்தபோது, காதலிப்பதாகக் கூறி அந்த இளைஞர் அவரைப் பாலியல் வன்கொடுமை செய்துள்ளார். இந்த வழக்கில் அந்த இளைஞர் கைது செய்யப்பட்டு நீண்ட காலம் சிறையில் அடைக்கப்பட்டார். இதற்கிடையில், அந்தப் பெண் ஒரு பெண் குழந்தையைப் பெற்றெடுத்தார்.
இந்த வழக்கின் பிணை (Jail Bail) மனு மீதான விசாரணை நீதிமன்றத்திற்கு வந்தபோது ஒரு முக்கியத் திருப்பம் ஏற்பட்டது. குற்றம் சாட்டப்பட்ட இளைஞர், அந்தப் பெண்ணைத் தனது மனைவியாக ஏற்றுக்கொள்வதாக இருந்தால் அவருக்கு ஜாமீன் வழங்கத் தயார் என்று நீதிபதி நிபந்தனை விதித்தார். ஆரம்பத்தில் அந்தப் பெண்ணைத் தனது காதலி என்று மட்டும் கூறி வந்த அந்த இளைஞர், சிறையிலிருந்து வெளியே வரவும், குழந்தையின் எதிர்காலத்தைக் கருத்தில் கொண்டும் உடனடியாக அந்த நிபந்தனைக்குச் சம்மதித்தார்.
நீதிமன்ற உத்தரவின்படி சிறையிலிருந்து விடுதலையான அந்த இளைஞர், நேராக வீட்டிற்கு வந்து முறைப்படி அந்தப் பெண்ணைத் திருமணம் செய்துகொண்டார். இந்தத் திருமணத்தின்போது அவர்களின் 9 மாதப் பெண் குழந்தையே முதன்மைச் சாட்சியாக இருந்தது அனைவரையும் நெகிழ வைத்தது. ஒரு கசப்பான சம்பவத்தில் தொடங்கிய இந்த உறவு, சட்டத்தின் தலையீட்டாலும் குழந்தையின் எதிர்கால நலனாலும் தற்போது ஒரு குடும்பமாக மாறியுள்ளது அந்தப் பகுதியில் பெரும் பேசுபொருளாகியுள்ளது.