சத்தீஸ்கர் மாநிலம் ஜாஞ்ச்கீர் சாம்பா மாவட்டத்தில், பள்ளிக் குழந்தைகள் சென்ற வேன் ஒன்று நிலைதடுமாறி விபத்துக்குள்ளானது பெரும் சோகத்தை ஏற்படுத்தியுள்ளது. சரஸ்வதி ஞான் மந்திர் பள்ளியைச் சேர்ந்த இந்த வேனை, வழக்கமான ஓட்டுநர் விடுப்பில் இருந்ததால் பள்ளித் தாளாளரே ஓட்டிச் சென்றுள்ளார். அப்போது எதிர்பாராதவிதமாகச் சாலையோரம் நின்றிருந்த டிராக்டர் மீது வேன் மோதி கவிழ்ந்ததில், அதிலிருந்த ஒரு ஆசிரியை மற்றும் 10-க்கும் மேற்பட்ட சிறுவர்கள் பலத்த காயமடைந்தனர்.
இந்தக் கொடூர விபத்தில் சிக்கிய குழந்தைகளுக்குத் தலையில் பலத்த காயங்கள் ஏற்பட்டுள்ளதோடு, சிலரது நிலைமை கவலைக்கிடமாக உள்ளது. விபத்து நடந்தவுடன் விரைந்து வந்த காவல்துறையினர் மற்றும் பொதுமக்கள், காயமடைந்தவர்களை மீட்டு உடனடியாக மாவட்ட மருத்துவமனையில் அனுமதித்தனர். பள்ளி நிர்வாகத்தின் அஜாக்கிரதையால் இந்த அசம்பாவிதம் நடந்ததா என்ற கோணத்தில் போலீசார் தீவிர விசாரணை நடத்தி வருகின்றனர். தகவல் அறிந்து பதறியடித்து ஓடிவந்த பெற்றோர்கள், மருத்துவமனையில் தங்கள் குழந்தைகளின் நிலையைக் கண்டு கதறி அழுதது காண்போரை நெகிழ வைத்தது.