தமிழக அரசியலில் பெரும் எதிர்பார்ப்புகளை ஏற்படுத்தியுள்ள நடிகர் விஜய்யின் ‘தமிழக வெற்றிக் கழகம்’ (தவெக), தற்போது அண்டை மாநிலமான கேரளாவிலும் பேசுபொருளாக மாறியுள்ளது. கேரளாவில் ஆளும் கட்சியான சி.பி.எம். நடத்திய சமீபத்திய கருத்துக்கணிப்புகளில், நடிகர் விஜய்க்கு 4 முதல் 5 சதவீத ஆதரவு இருப்பது கண்டறியப்பட்டுள்ளது. இந்தத் தகவல் கேரள கம்யூனிஸ்ட் வட்டாரத்தில் பெரும் ஆச்சரியத்தை ஏற்படுத்தியுள்ளது.
கேரளாவில் சி.பி.எம்.-க்கு எதிரான அலை வீசுவதாகவும், ஆட்சியை காங்கிரஸ் கைப்பற்ற வாய்ப்புள்ளதாகவும் கருத்துக்கணிப்புகள் தெரிவிக்கின்றன. இந்தச் சூழலில், தங்கள் ஆட்சியைத் தக்கவைக்க விஜய்யின் ஆதரவு கைகொடுக்கும் என்று கேரள மாநில சி.பி.ஐ. தலைமை கருதுகிறது. இதன்காரணமாக, சி.பி.எம். கூட்டணிக்குள் விஜய்யை இணைப்பது குறித்து முதல்வர் பினராயி விஜயன் கட்சியின் தேசிய தலைமை மட்டத்தில் ஆலோசனைகளை நடத்தியுள்ளார்.
இருப்பினும், இந்த யோசனையை தமிழக சி.பி.எம். தலைவர்கள் ஏற்க மறுத்துவிட்டனர். திமுக கூட்டணியில் தாங்கள் கண்ணியமாக இருப்பதாகவும், ஒரு நடிகரைச் சார்ந்திருப்பது கட்சியின் கொள்கைகளுக்கு முரணானது என்றும் அவர்கள் தேசிய தலைமையிடம் விளக்கம் அளித்துள்ளனர். மேலும், தமிழகத்தில் திமுக கூட்டணியில் இருந்து கொண்டு, கேரளாவில் விஜய்யுடன் கைகோர்ப்பது அரசியல் ரீதியாகப் பொருத்தமற்றது என்றும் அவர்கள் சுட்டிக்காட்டியுள்ளனர்.
திமுக கூட்டணியில் பிளவு ஏற்பட்டால் மட்டுமே தமிழக சி.பி.எம். போன்ற முடிவுகளை எடுக்க வாய்ப்புள்ளது. ஆனால், கூட்டணி கட்சிகளைத் தக்கவைப்பதில் முதல்வர் ஸ்டாலின் காட்டும் கவனமான அணுகுமுறை, இப்போதைக்கு அத்தகைய சூழல் ஏற்பட வாய்ப்பில்லை என்பதை உணர்த்துகிறது. ஒட்டுமொத்தத்தில், நடிகர் விஜய்யின் அரசியல் செல்வாக்கு தமிழக எல்லைகளையும் தாண்டி தென்னிந்திய அரசியலில் ஒரு புதிய விவாதத்தை உருவாக்கியுள்ளது.