தமிழக அரசியலில் பெரும் எதிர்பார்ப்பை ஏற்படுத்தியுள்ள 2026 சட்டமன்றத் தேர்தலை முன்னிட்டு, தமிழக வெற்றிக் கழகத் தலைவர் விஜய் தனித்துப் போட்டியிடப் போவதாக அறிவித்திருந்தார். இருப்பினும், ஆளும் திமுக – காங்கிரஸ் கூட்டணி உறுதியாகியுள்ள நிலையில், அவரைத் தேசிய ஜனநாயகக் கூட்டணியில் (NDA) இணைக்கப் பாரதிய ஜனதா கட்சி தீவிர முயற்சி எடுத்து வருவதாகத் தகவல்கள் தெரிவிக்கின்றன.
மத்திய அமைச்சர் அமித் ஷாவின் அறிவுறுத்தலின் பேரில், ஆந்திர துணை முதலமைச்சரும் விஜய்யின் நெருங்கிய நண்பருமான பவன் கல்யாண் இந்த பேச்சுவார்த்தையை முன்னெடுத்து வருவதாகக் கூறப்படுகிறது. ஒருவேளை விஜய் கூட்டணிக்கு வந்தால், அவருக்கு இரண்டரை ஆண்டுகள் முதலமைச்சர் (CM) பதவி வழங்கப்படலாம் என்ற கவர்ச்சிகரமான சலுகையை பவன் கல்யாண் முன்வைத்துள்ளதாகச் செய்திகள் உலா வருகின்றன.
இந்த மெகா ஆஃபர் குறித்து விஜய் இதுவரை எந்தப் பச்சைக்கொடியும் காட்டவில்லை. தற்போதைய சூழலில், அவர் பனையூரில் உள்ள தனது அலுவலகத்தில் கட்சியின் முக்கிய நிர்வாகிகளுடன் அவசர ஆலோசனையில் ஈடுபட்டுள்ளார். தனித்துப் போட்டியா அல்லது கூட்டணியா என்பது குறித்த இறுதிக்கட்ட முடிவை அவர் விரைவில் அறிவிப்பார் என்று எதிர்பார்க்கப்படுகிறது.