தமிழ்நாடு அரசு ஊழியர்கள் மற்றும் ஆசிரியர்களுக்குப் பயனுள்ள வகையில், கருவூலத் துறை தற்போது ‘ஜிபிஎம் 2.0’ திட்டத்தின் கீழ் தரவுகளைப் புதுப்பிக்கும் பணிகளைத் தீவிரப்படுத்தியுள்ளது. இந்தத் திட்டத்தின் முக்கிய நோக்கம், ஒவ்வொரு அரசு ஊழியருக்கும் 11 இலக்க தனித்துவ அடையாள எண்ணை உருவாக்கி, அவர்களின் வங்கி கணக்கு, ஆதார், பான் கார்டு மற்றும் மொபைல் எண் போன்ற தனிப்பட்ட விவரங்களில் உள்ள பிழைகளைச் சரிசெய்வதாகும்.
இது குறிப்பாக, ஒரு ஊழியரின் தரவு மற்றொரு ஊழியருடன் பொருந்தாமல் இருப்பதை உறுதி செய்யவும், சம்பளம் மற்றும் இதர பணப்பலன்கள் தடையின்றி வங்கி கணக்கிற்குச் சென்று சேருவதை உறுதிப்படுத்தவும் இந்த ‘டேட்டா கிளீன்சிங்’ பணி அவசியமாக்கப்பட்டுள்ளது. போர்ட்டல் மூலம் மேற்கொள்ளப்படும் இந்தச் சரிபார்ப்புப் பணியில், ஊழியர்களின் பெயர் மற்றும் பிறந்த தேதி ஆகியவை பணிப் பதிவேடு மற்றும் இதர கணக்குத் தாள்களில் ஒரே மாதிரியாக இருக்க வேண்டும்.
பெயரின் இனிஷியல் ஆங்கிலப் பெரிய எழுத்துக்களில் பெயருக்குப் பின்னால் இருக்க வேண்டும் என்றும், தம்பதியர் இருவருமே அரசு ஊழியர்களாக இருந்தால் தனித்தனி மொபைல் எண்களைப் பயன்படுத்த வேண்டும் என்றும் அறிவுறுத்தப்பட்டுள்ளது. திருத்தங்கள் மேற்கொள்ளப்படும் பட்சத்தில், அதற்கான ஆதார ஆவணங்களை 1 MB அளவிற்குள் பதிவேற்றம் செய்ய வேண்டும். இந்த அப்டேட்களைச் சரியாக முடிக்காத பட்சத்தில் சம்பளம் நிறுத்தி வைக்கப்பட வாய்ப்புள்ளது. ஊழியர்கள் விரைந்து இந்தப் பணிகளை முடிக்குமாறு கேட்டுக் கொள்ளப்படுகிறார்கள்.