தமிழகத்தில் தேர்தல் களம் சூடுபிடிக்கத் தொடங்கியுள்ள நிலையில், அரசியல் கட்சிகளின் கடன் தள்ளுபடி குறித்த அறிவிப்புகள் பொதுமக்களிடையே பெரும் எதிர்பார்ப்பை ஏற்படுத்தியுள்ளன. குறிப்பாக, 5 ஏக்கர் வரை நிலம் வைத்துள்ள விவசாயிகளின் பயிர்க்கடனை முழுமையாக ரத்து செய்வோம் என்ற விஜய்யின் அதிரடி வாக்குறுதி, ஆளுங்கட்சியான திமுக மற்றும் எதிர்க்கட்சியான அதிமுக ஆகிய இரு தரப்புக்கும் பெரும் அரசியல் அழுத்தத்தைக் கொடுத்துள்ளது.
கடந்த முறை ‘5 சவரன் நகைக்கடன் தள்ளுபடி’ என்ற வாக்குறுதியைச் செயல்படுத்திப் பெரும் வரவேற்பைப் பெற்ற திமுகவும், அதே பாணியில் புதிய அறிவிப்புகளை வெளியிடத் திட்டமிடும் அதிமுகவும், வரும் தேர்தலை முன்னிட்டு இன்னும் கவர்ச்சிகரமான தள்ளுபடி அறிவிப்புகளை வெளியிடக்கூடும் என அரசியல் விமர்சகர்கள் கருதுகின்றனர். கூட்டுறவு வங்கிகளில் நிலுவையில் உள்ள நகைக் கடன்கள் மற்றும் விவசாயக் கடன்கள் தொடர்பாக இந்தப் பெரிய கட்சிகள் எப்போது அதிகாரப்பூர்வ அறிவிப்பை வெளியிடும் என்பதே தற்போது தமிழக அரசியலின் ஹாட் டாப்பிக் ஆக மாறியுள்ளது.