தமிழகத்தில் விரைவில் சட்டமன்றத் தேர்தல் நடைபெறவுள்ள சூழலில், அதிமுக – பாஜக தலைமையிலான தேசிய ஜனநாயகக் கூட்டணியின் பிரம்மாண்ட பொதுக்கூட்டம் இன்று மதுரையில் நடைபெறுகிறது. இந்த மாநாட்டில் பங்கேற்பதற்காகவும், பல்வேறு அரசு நலத்திட்டங்களைத் தொடங்கி வைப்பதற்காகவும் பிரதமர் நரேந்திர மோடி இன்று மதுரைக்கு வருகை தருகிறார். இதற்காக மதுரையில் பலத்த பாதுகாப்பு ஏற்பாடுகள் செய்யப்பட்டுள்ள நிலையில், அரசியல் களம் சூடுபிடித்துள்ளது.
பிரதமரின் வருகையை முன்னிட்டு மதுரை மாநகரின் பல்வேறு பகுதிகளில் காங்கிரஸ் கட்சியின் சார்பில் ‘Go Back Modi’ (திரும்பிப் போ மோடி) என்ற வாசகங்கள் அடங்கிய போஸ்டர்கள் ஒட்டப்பட்டுள்ளன. குறிப்பாக, “திருப்பரங்குன்றம் உங்களை வரவேற்கவில்லை” மற்றும் “மத ரீதியான மூளைச்சலவை வேண்டாம்” போன்ற கடுமையான வாசகங்கள் அந்த போஸ்டர்களில் இடம்பெற்றுள்ளன. இந்த போஸ்டர்கள் மதுரை முழுவதும் பரவலாகக் காணப்படுவதால் பெரும் பரபரப்பு ஏற்பட்டுள்ளது.
தனது பயணத் திட்டத்தின் ஒரு பகுதியாக, பிரதமர் மோடி இன்று பிற்பகல் மதுரை வந்தடைகிறார். அங்கு சுமார் 4,400 கோடி ரூபாய் மதிப்பிலான தேசிய நெடுஞ்சாலைத் திட்டங்களை அவர் தொடங்கி வைக்க உள்ளார். அதனைத் தொடர்ந்து, திருப்பரங்குன்றம் முருகன் கோவிலில் சாமி தரிசனம் செய்யும் அவர், மாலையில் மண்டேலா நகர் பகுதியில் நடைபெறும் பிரம்மாண்ட தேர்தல் பிரச்சாரக் கூட்டத்தில் உரையாற்றுகிறார்.
இந்த பொதுக்கூட்டத்தில் அதிமுக பொதுச்செயலாளர் எடப்பாடி பழனிசாமி, பாமக தலைவர் அன்புமணி ராமதாஸ், தமாகா தலைவர் ஜி.கே.வாசன் மற்றும் டிடிவி தினகரன் உள்ளிட்ட கூட்டணி கட்சித் தலைவர்கள் பங்கேற்கின்றனர். ஒருபுறம் பிரம்மாண்ட வரவேற்பு ஏற்பாடுகள் நடைபெற்று வரும் வேளையில், மறுபுறம் எதிர்க்கட்சியினர் ஒட்டியுள்ள எதிர்ப்பு போஸ்டர்கள் மதுரையில் அரசியல் ரீதியாகப் பெரும் விவாதத்தை ஏற்படுத்தியுள்ளன.