தமிழக வெற்றிக் கழகத்தில் இணைந்த அதிமுகவினர் மீண்டும் தங்கள் தாய் கழகத்திற்கே திரும்ப விரும்புவதாக முன்னாள் அமைச்சர் எஸ்.பி.வேலுமணி தெரிவித்துள்ளார். கோயம்புத்தூர் மாவட்டம் சூலூர் பகுதியில் நடைபெற்ற அதிமுக பொதுக்கூட்டத்தில் பேசிய அவர், கரூர் விவகாரத்தில் தனது கட்சித் தொண்டர்கள் உயிரிழந்தபோது கூட தவெக தலைவர் விஜய் நேரில் சென்று ஆறுதல் கூறவில்லை என விமர்சித்தார். இத்தகைய சூழலால் அதிருப்தியடைந்த பல தொண்டர்கள், அதிமுகவில் தங்களுக்கு உரிய அங்கீகாரமும் பதவியும் வழங்கப்பட்டால் மீண்டும் கட்சியில் இணையத் தயாராக இருப்பதாகத் தூது விட்டுள்ளதாக அவர் குறிப்பிட்டுள்ளார்.
அதிமுகவிலிருந்து விலகி மாற்றுப் பாதையைத் தேர்ந்தெடுத்தவர்கள், தற்போது அங்குள்ள செயல்பாடுகளால் ஏமாற்றமடைந்து மீண்டும் எடப்பாடி பழனிசாமி தலைமையிலான அதிமுகவை நோக்கி வரத் தொடங்கியுள்ளதாக வேலுமணி சுட்டிக்காட்டினார். கட்சியின் அடிமட்டத் தொண்டர்களின் உணர்வுகளுக்கு அதிமுக எப்போதும் மதிப்பளிக்கும் என்றும், தவெகவில் இருந்து வெளியேறத் துடிக்கும் அதிமுகவினரின் கோரிக்கைகள் பரிசீலிக்கப்படும் என்றும் அவர் தனது உரையில் நம்பிக்கை தெரிவித்தார். இந்த அறிவிப்பு தமிழக அரசியல் வட்டாரத்தில், குறிப்பாக கோவை மற்றும் கொங்கு மண்டல அதிமுகவினரிடையே பெரும் பரபரப்பை ஏற்படுத்தியுள்ளது.