2026 சட்டமன்றத் தேர்தலில் எவ்விதக் கூட்டணியும் இன்றி 234 தொகுதிகளிலும் நாம் தமிழர் கட்சி தனித்துப் போட்டியிடும் என்பதில் உறுதியாக உள்ள சீமான், அதற்கான பணிகளைத் தற்போது முடுக்கிவிட்டுள்ளார். இதன் ஒரு பகுதியாக, இன்று (பிப்.07) சென்னையில் உள்ள கட்சித் தலைமை அலுவலகத்தில் 234 தொகுதிகளுக்கான வேட்பாளர்களுடன் அவர் ஆலோசனையில் ஈடுபட்டார். இக்கூட்டத்தில் தேர்தல் பரப்புரைக்கான வியூகங்கள், வேட்பாளர்கள் தங்கள் தொகுதிகளில் மேற்கொள்ள வேண்டிய களப்பணிகள் மற்றும் மக்களின் அடிப்படைத் தேவைகளை மையப்படுத்தி எவ்வாறு பரப்புரை செய்வது என்பது குறித்து விரிவாக விவாதிக்கப்பட்டது.
ஆலோசனையின் போது, திமுக அரசின் மீதுள்ள அதிருப்திகளை மக்கள் மத்தியில் கொண்டு செல்வதையே முதன்மை இலக்காகக் கொள்ள வேண்டும் என்று சீமான் அறிவுறுத்தியதாகக் கூறப்படுகிறது. குறிப்பாக, கடந்த தேர்தலின் போது திமுக அளித்த வாக்குறுதிகளில் நிறைவேற்றப்படாதவை எவை, கல்வி, மருத்துவம் மற்றும் சுற்றுச்சூழலில் நிலவும் போதாமைகள் குறித்துப் புள்ளிவிவரங்களுடன் பொதுமக்களிடம் எடுத்துரைக்க வேட்பாளர்களுக்குக் கட்டளையிடப்பட்டுள்ளது. ஆளுங்கட்சியின் குறைகளைச் சுட்டிக்காட்டுவதன் மூலம், ஒரு மாற்றாகத் தங்களை நிலைநிறுத்திக்கொள்ள நாம் தமிழர் கட்சி திட்டமிட்டுள்ளது.