மும்பை கோரேகாவ் பகுதியில் உள்ள ஒரு அடுக்குமாடி குடியிருப்பில், லிப்ட்டுக்குள் (Elevator) ஹைட்ரஜன் வாயு நிரப்பப்பட்ட பலூன்கள் திடீரென வெடித்துச் சிதறிய சம்பவம் பெரும் அதிர்ச்சியை ஏற்படுத்தியுள்ளது. கடந்த புதன்கிழமை அன்று நடந்த இந்த விபத்தில், மூன்று நபர்கள் பலூன்களுடன் மின்தூக்கியில் ஏறியபோது எதிர்பாராதவிதமாக அவை தீப்பிடித்து வெடித்தன. கண் இமைக்கும் நேரத்தில் மின்தூக்கி முழுவதும் நெருப்புப் பிழம்பாக மாறிய நிலையில், உள்ளே இருந்தவர்கள் அலறியடித்துக் கொண்டு வெளியே ஓடி உயிர் தப்பினர். இந்த திக் திக் காட்சிகள் அங்கிருந்த சிசிடிவி கேமராவில் பதிவாகி சமூக வலைதளங்களில் வைரலாகி வருகிறது.
இந்த விபத்தில் காயமடைந்தவர்கள் உடனடியாக சிகிச்சைக்காக மருத்துவமனையில் அனுமதிக்கப்பட்டுள்ளனர். பாதுகாப்பற்ற முறையில் ஹைட்ரஜன் வாயு நிரப்பப்பட்ட பலூன்களை விநியோகித்தது மற்றும் கவனக்குறைவாகச் செயல்பட்டது ஆகிய காரணங்களுக்காக, சம்பந்தப்பட்ட பலூன் வியாபாரி மீது காவல்துறையினர் வழக்குப் பதிவு செய்துள்ளனர். பொதுவாக ஹைட்ரஜன் வாயு எளிதில் தீப்பற்றக்கூடியது என்பதால், இதுபோன்ற பலூன்களை மூடிய இடங்களுக்குள் கொண்டு செல்வது எவ்வளவு ஆபத்தானது என்பதை இந்தச் சம்பவம் உணர்த்தியுள்ளது.
Instagram இல் இந்தப் பதிவைக் காண்க